வரதட்சணைக்காக மருமகள் கொலை; 85 வயது பெண்ணுக்கு ஆயுள் தண்டனை

by *சம்ஸ் Mon 31 Oct 2011 - 6:20

டெல்லி துர்க்மான் கேட் பகுதியைச் சேர்ந்தவர் ஹசன் பானு. இவருக்கு நசிம். நசிருதீன் என்ற 2 மகன்கள் உள்ளனர். இவர்கள் இருவரும் சுயமாக தொழில் செய்து வருகின்றனர். நசுருதீனுக்கும், உறவுப் பெண்ணான குல்நாஸ் என்பவருக்கும் கடந்த 2007-ம் ஆண்டு திருமணம் நடந்தது. ஒரு சில மாதங்களில் நசிருதீன் வெளிநாடு சென்று விட்டார்.

குல்நாஸ் கணவர் வீட்டில் மாமியாருடன் வசித்து வந்தார். இந்த நிலையில் ஹசன் பானுவும், மூத்த மகன் நசிமும் சேர்ந்து குல்நாசை கூடுதல் வரதட்சணை கேட்டு கொடுமைப்படுத்தினர். குல்நாஸ் குடும்பம் வசதியில்லாத குடும்பம் என்பதால் இவர்கள் கேட்ட பணம் மோட்டார்சைக்கிள் ஆகியவற்றை தர முடியவில்லை.

இதனால் வரதட்சணை கொடுமை தொடர்ந்தது. இந்நிலையில் வெளிநாடு சென்றிருந்த நசுருதீன் நாடு திரும்பினார். அவரிடம் தனக்கு நேர்ந்த கொடுமையை சொல்லி குல்நாஸ் அழுதார். இது அவரது மாமியாருக்கு மேலும் ஆத்திரத்தை ஏற்படுத்தியது. கடந்த 2008-ம் ஆண்டு அக்டோபர்
22-ந்தேதி இரவு, தூங்கிக் கொண்டிருந்த குல்நாஸ் மீது மாமியார் ஹசான் மண்எண்ணையை ஊற்றினார்.

மூத்த மகன் நசிம் தீக்குச்சியை உரசி குல்நாஸ் மீது போட்டார். அவரது உடலில் தீ பற்றி எரிந்தது. அவரது அலறல் சத்தம் கேட்டு, பக்கத்து அறையில் படுத்திருந்த நசுருதீனும், அவரது உறவினர் சோயிப்பும் ஓடி வந்தனர். உடலில் எரிந்து கொண்டிருந்த தீயை அணைத்து அருகில் உள்ள ஆஸ்பத்திரியில் சேர்த்தனர்.

சிகிச்சை பலனின்றி அவர் பலியானார். இந்த வழக்கு டெல்லி கூடுதல் செசன்ஸ் கோர்ட்டில் நடந்து வந்தது. விசாரணைகள் முடிந்து நீதிபதி பவன்குமார் ஜெயின் தீர்ப்பு அளித்தார். ஹசன்பானு (85), நசிம் இருவருக்கும் ஆயுள் தண்டனை அளித்தார். மேலும் இருவருக்கும் தலா ரூ. 12 ஆயிரம் அபராதம் விதித்தும் தீர்ப்பு கூறினார்.