கடன் சுமையை சமாளிக்கவே எரிபொருட்களின் விலை அதிகரிப்பு : பெற்றோலியக் கூட்டுத்தாபனம் _

by **முனாஸ் சுலைமான்** Tue 1 Nov 2011 - 12:31

நாட்டில் திடீரென எரிபொருட்களின் விலைகள் உயர்த்தப்பட்டமைக்கு பிரதானமாக இரு விடயங்கள் மூலகாரணமாக அமைந்ததென இலங்கை பெற்றோலியக் கூட்டுத்தாபனம் தெரிவித்துள்ளது.

எரிபொருள் விலை அதிகரிப்பு குறித்து இலங்கை பெற்றோலியக் கூட்டுத்தாபன தலைவர் ஹெரி ஜயவர்தனவின் கையழுத்திட்டு விடுவிக்கப்பட்டுள்ள அறிக்கையில்:

நீண்டகாலமாக மத்திய கிழக்கு மற்றும் ஐரோப்பிய நாடுகளில் காணப்பட்ட பிரச்சினை மற்றும் பொருளாதார சிக்கல் என்பவற்றால் உலக சந்தையில் எரிபொருள் விலை அதிகரித்துள்ளது.

அதேபோன்று கடந்த காலங்களில் அதிக மழை கிடைக்காததால் நீர் மின் விநியோகம் குறைந்த நிலையில் மின்சாரம் தயாரிக்க மேலதிக எரிபொருளை நிவாரண நிலையில் மின்சக்தி அமைச்சுக்கு வழங்கவேண்டி ஏற்பட்டுள்ளது.

இதனால் இலங்கை பெற்றோலிய கூட்டுத்தாபனத்தின் கடன் சுமை அதிகரித்துச் சென்றது. எனினும் அந்த கடன் சுமையை மக்கள் மீது சுமத்தாதிருக்க அரசாங்கம் கடும் பிரயத்தனங்களை மேற்கொண்டு வந்தது.

உலக சந்தையில் எரிபொருள் விலை அதிகரித்தபோதும் அதனை இலங்கையில் அதிகரிக்காது அரசு செயற்பட்டது.

எனினும் தற்போது ஏற்பட்டுள்ள அதிக கடன் சுமையால் அதன் ஒரு பகுதியை செலுத்தவென எரிபொருள் விலை அதிகரித்து மக்களுக்கு சுமை வழங்கப்பட்டுள்ளதோடு அதன் கூடிய கடன் சுமையை அரசு ஏற்றுக்கொண்டுள்ளது என அவ்வறிக்கையில் கூறப்பட்டுள்ளது. இதேவேளை எரிபொருள் விலை அதிகரிப்பால் முச்சக்கரவண்டி ஓட்டுநர்கள் பாரிய பிரச்சினைகளை எதிர்கொண்டு வருவதாக சுயதொழில் புரிவோர் சங்கம் தெரிவித்துள்ளது.

இதனால் முச்சக்கரவண்டி ஓட்டுநர்களுக்கு நிவாரணம் வழங்குமாறு அரசாங்கத்திடம் கோரிக்கை விடுவிக்கப்பட்டுள்ளதாக அந்த சங்கத்தின் தலைவர் மஹிந்த கஹந்தகம தெரிவித்தார்.

இலங்கையில் முச்சக்கரவண்டி சேவையில் 20 இலட்சம் தொழில் புரிவோர் இணைந்துள்ளதாக அவர் சுட்டிக்காட்டியுள்ளார். அதனால் முச்சக்கரவண்டி கட்டணத்தை அதிகரித்து பொதுமக்களை சிரமத்துக்கு உள்ளாக்காமல் எரிபொருள் நிவாரணம் வழங்க அரசாங்கம் முன்வரவேண்டும் என சுயதொழில் புரிவோர் சங்கத்தின் தலைவர் கேட்டுக்கொண்டுள்ளார். ___