சிக்னலில் காரை நிறுத்தாமல் சென்ற போலீஸ் ஏ.டி.ஜி.பிக்கு ரூ.1000 அபராதம்

by **நேசமுடன் ஹாசிம்** Fri 11 Nov 2011 - 11:19

திருவனந்தபுரத்தில் சிக்னலில் காரை நிறுத்தாமல் சென்ற போலீஸ் ஏ.டி.ஜி.பி காருக்கு ரூ.1000 அபராதம் விதிக்கப்பட்டது.
கேரளாவில் திருவனந்தபுரம் நகரில் போக்குவரத்து விதிகளை மீறுபவர்களைக் கண்காணிக்க முக்கிய இடங்களில் ரகசிய கண்காணிப்பு கேமராக்கள் பொருத்தப்பட்டுள்ளன. இந்த கேமராக்களில் பதிவாகும் காட்சிகளை கட்டுப்பாட்டு அறையிலிருந்து போலீசார் கண்காணித்து வருகின்றனர்.

கடந்த சில தினங்களுக்கு முன் காலை 10 மணியளவில் திருவனந்தபுரம் கவடியார் பகுதியில் போக்குவரத்து சிக்னலில் சிவப்பு விளக்கு எரிந்ததால், வாகனங்கள் நின்றன. அப்போது சுழல் விளக்கு பொருத்தப்பட்ட காவல் துறை கார் சிக்னலில் நிற்காமல் வேகமாக சென்றது. இந்த காரின் எண் கேமராவில் பதிவானது. விசாரணையில் அந்தக் காரை நிர்வாகப் பிரிவு ஏ.டி.ஜி.பி. வேணுகோபால் பயன்படுத்துவது தெரியவந்தது. இது குறித்து போக்குவரத்து ஆணையாளர் அலுவலகத்திற்கு தகவல் தெரிவிக்கப்பட்டது. இதையடுத்து, போக்குவரத்து விதிகளை மீறியதால் ரூ.1000 அபராதம் கட்டக்கோரி டி.ஜி.பி. அலுவலகத்திற்கு போக்குவரத்து ஆணையாளர் அலுவலகத்தில் இருந்து நோட்டீஸ் அனுப்பப்பட்டது.

இந்த தகவல் ஏ.டி.ஜி.பி. வேணுகோபால் நாயருக்கும் தெரிவிக்கப்பட்டது. இதையடுத்து, வேணுகோபால் நாயரின் டிரைவர், திருவனந்தபுரம் வட்டார போக்குவரத்து அலுவலகத்திற்கு சென்று அபராதத் தொகையை கட்டினார். இது குறித்து ஏ.டி.ஜி.பி. வேணுகோபால் நாயர் கூறுகையில், ‘போக்குவரத்து சிக்னலை மீறி எனது டிரைவர் காரை ஓட்டியது தவறுதான். அந்த சமயத்தில் நான் காரில் இருந்தேனா என்பது எனக்கு ஞாபகமில்லை’ என்றார்.