இடதுசாரி அரசை வீட்டுக்கு அனுப்புங்கள்

-ராகுல் காந்தி
மேற்குவங்கம், கேரளத்தைப் போன்று, திரிபுராவிலும் இடதுசாரிகளின் ஆட்சியை அகற்ற வேண்டும் என்று காங்கிரஸ் பொதுச் செயலாளர் ராகுல் காந்தி கூறியுள்ளார்.

திரிபுரா மாநிலத்தில் நடந்த பொதுக்கூட்டத்தில் வியாழக்கிழமை அவர் பேசியது. மேற்கு வங்கத்தில் 30 ஆண்டுகளுக்கு மேல் பொறுப்பிலிருந்த இடதுசாரிகளின் ஆட்சியை மக்கள் தூக்கியெறிந்தார்கள். இதேபோன்று கேரளத்திலும் இடதுசாரிகளின் ஆட்சிக்கு எதிராக கடந்த மே மாதம் நடைபெற்ற சட்டப் பேரவைத் தேர்தலில் மக்கள் வாக்களித்தனர்.

திரிபுரா மக்களும் இதே பாணியை கடைபிடித்து செயல்படாத திரிபுரா மாநில அரசுக்கு எதிராக வரும் 2013ம் ஆண்டு சட்டப் பேரவைத் தேர்தலில் வாக்களிக்க வேண்டும். மார்க்சிஸ்ட்டுகள் கடந்த காலத்திலேயே வாழ்கிறார்கள்.

ரஷியாவிலிருந்த கம்யூனிஸ்ட்டுகள் தூக்கியெறியப்பட்டனர். என்பதை அவர்கள் உணரவேண்டும். இதே கதிதான் திரிபுரா அரசுக்கும் நேரிடும்.

ஏழைகள், உழைப்பாளார்களின் மேம்பாட்டுக்காகவும், உயர்வுக்காகவும் பாடுபடும் என்று கம்யூனிஸ்ட் கட்சியின் தேர்தல் அறிக்கையில் தெரி விக்கப்பட்டுள்ளது. ஆனால் பிரிபுராவில் உள்ள அரசு இதை செயல்படுத்தவில்லை.

பல்வேறு நலத்திட்டங்களுக் கான நிதியின் பெரும்பகுதியை கம்யூனிஸ்ட்டுகளும், ஊழல் அரசு அதிகாரிகளும் அமுக்கிக் கொண்டனர். மத்திய அரசின் மக்களுக்கான நிதி அவர்களை சென்றடைய வில்லை என்பது துரதிஷ்டவசமானது. பெரும் நிதி ஒதுக்கியும், திரிபுரா மாநிலத்தில் சாலைகள், பள்ளிக்கூடங்கள், மருத்துவமனைகள் போன்ற அடிப்படை கட்டமைப்பு வசதிகள் உருவாக்கப்படவில்லை.

வறுமையை போக்கவும், ஆண்டில் 100 நாட்கள் வேலைவாய்ப்பு கிடைக்கும் நோக்கத்துடன், மகாத்மா காந்தி வேலைவாய்ப்பு உறுதித் திட்டத்தை மத்திய அரசு அமுல்படுத்தி வருகிறது. இது மற்ற எந்த நாட்டிலும் இல்லாத புதுமை திட்டமாகும். ஆனால், இடதுசாரி அரசு இதை முறையாக நிறைவேற்ற வில்லை.

டில்லி, மகாராஷ்டிரம், கேரளம், பஞ்சாப், ஹரியாணா, அசாம் போன்ற மாநிலங்கள் இதை முறையாக வளர்ச்சித் திட்டங்களுக்கு பயன்படுத்தி வருகின்றன.