சினிமாவும் அரசியலும் குழப்பம் தான்;நடிகர் பார்த்திபன் பேட்டி

by **நண்பன்** Sun 13 Nov 2011 - 9:08

நடிகர் பார்த்திபனின் 50-வது திரைப்படமான வித்தகன் டிரெயிலர் காட்சி
கோவை சாந்தி தியேட்டரில் ரசிகர்களுக்கு காண்பிக்கப்பட்டது. இதில் நடிகர்
பார்த்திபன் கலந்து கொண்டு ரசிகர்களுடன் கலந்துரையாடினார். பின்னர்
நிருபர்களிடம் அவர் கூறியதாவது:-

வித்தகன் எனது
50-வது படம். கமர்சியல் படமாக எடுக்கப்பட்டுள்ளது. இருந்தாலும் கூட அதில்
பல கருத்துக்கள் இருக்கிறது. வித்தியாசமான காமெடி காட்சிகளும் உள்ளது.
வித்தகன் படம் மூலமாக எனக்கு சரியான மரியாதை கிடைக்கும். எனது புதிய பாதை
படம் ஜனரஞ்சகமாகவும், அநாதைகளை உருவாக்கக் கூடாது என்ற மெசேஜாகவும்
இருந்தது. நான் என்னை நம்புகிறேன். எனது ரசிகர்களை நம்புகிறேன்.

சினிமாவில்
தவற விட்ட இடத்தை நானே தேடுகிறேன். சினிமாவில் நான் தொட நினைத்த சிகரத்தை
தொடுவதற்கு 2011-ம் ஆண்டு ஆரம்பமாக இருக்கும் என நினைக்கிறேன். எந்த
மாதிரியான படங்களை விரும்புகிறார்கள் என்பதை மக்கள் குழப்புகிறார்கள்.
சினிமாவும், அரசியலும் குழப்பம் தான். சினிமாவில் தொட நினைத்த இடத்தை
நிறைவு செய்த பின் 10 பைசா கூட சம்பாதிக்காத அரசியல்வாதியாக வரவேண்டும் என
விரும்புகிறேன்.

சினிமாவில் நமது இடத்தை நிலை
நிறுத்தி கொள்வது கஷ்டம். பாரதிராஜாவின் அன்ன கொடியும் கொடிவீரனும்
படத்தில் நடிக்க வாய்ப்பு கிடைத்த போது அவர் படத்தில் நடித்தால் நல்ல
அனுபவம் கிடைக்கும் என எதிர்பார்த்தேன். நடிப்பதற்கான அனைத்து ஏற்பாடுகளும்
முடிந்த நிலையில் திடீர் என நான் நடிக்கும் கேரக்டரில் அமீர் நடிப்பதாக
தகவல் வந்தது. நான் புறக்கணிக்கப்பட்டேன் என்பதற்கான காரணம் குறித்து இந்த
நிமிடம் வரையிலும் பாரதிராஜா என்னிடம் கூறவில்லை. இதற்காக நான்
கவலைப்படவில்லை.

வித்தகன் படத்தை வெளியிடுவதில்
கவனம் செலுத்தி வருகிறேன். அஜித், விஜய் ஆகியோரின் படங்கள் வெளிவரும் போதே
அதற்கு சிறந்த ஓபனிங் தரப்படுகிறது. வித்தகன் படத்திற்கு அதுபோன்ற ஓபனிங்
கிடைக்க போராடி வருகிறேன். இந்த படம் மக்களிடம் நிச்சயம் வரவேற்பு பெறும்.

அதற்கு
முன் மக்களை திரையரங்கிற்கு உள்ளே கொண்டு வரத்தான் போராடுகிறேன். இந்த
படத்தில் கதாநாயகிக்கு அதிக முக்கியத்துவம் கொடுக்கப்பட்டுள்ளது. படம்
வருகிற 18-ந் தேதி வெளியிடப்படுகிறது. இவ்வாறு அவர் கூறினார்.