காங்கிரசின் செயல் தலைவராக ராகுல்காந்தி நியமிக்கப்பட்டால் வரவேற்பேன்; மன்மோகன்சிங் பேட்டி

காங்கிரசின் செயல் தலைவராக ராகுல்காந்தி நியமிக்கப்பட்டால் வரவேற்பேன்
என்று பிரதமர் மன்மோகன்சிங் கூறினார். மாலத்தீவில் நடந்த சார்க்
மாநாட்டில் பிரதமர் மன்மோகன் சிங் கலந்து கொண்டு விட்டு நேற்று டெல்லி
திரும்பினார். முன்னதாக விமானத்தில் பயணம் செய்தபடியே நிருபர்களுக்கு
பேட்டி அளித்தார்.

அவரிடம் காங்கிரசின் செயல்
தலைவராக ராகுல் காந்தியை நியமிப்பது பற்றி கருத்து கேட்டனர். அதற்கு
மன்மோகன்சிங் பதில் அளிக்கையில் காங்கிரசின் செயல் தலைவராக ராகுல் காந்தியை
நியமிப்பது என்பது கட்சி விவகாரம். அது குறித்து என்னால் பேச முடியாது.
கட்சியில் செயல் தலைவர் உள்ளிட்ட எந்த பொறுப்பு அளிக்கப்பட்டாலும் அதை நான்
முழுமனதோடு வரவேற்பேன் என்றார். மேலும் அவர் கூறியதாவது:-

தமிழக
மீனவர்கள் இலங்கை கடற்படையினரால் தொடர்ந்து அத்து மீறி தாக்கப்படுவது
குறித்து மாலத்தீவில் இலங்கை அதிபர் ராஜபக்சேவிடம் பேசினேன். இந்திய
மீனவர்கள் தாக்கப்படுவதை ஏற்றுக் கொள்ள முடியாது என்பதை அவர்
ஒப்புக்கொண்டார். இதில் மனிதாபிமான அடிப்படையில் தீர்வு காண வேண்டும் என
தெரிவித்தார்.

பாகிஸ்தான் பிரதமர் கிலானியை நான் 4
முறை சந்தித்து இருதரப்பு உறவு குறித்து பேசி இருக்கிறேன். அப்போது இரு
நாடுகளுக்கு இடையேயான பிரச்சினைக்கு சுமூகமான பேச்சுவார்த்தை மூலமே தீர்வு
காணமுடியும் என்பதையே அவர் வலியுறுத்தினார். அமைதியின் அவசியத்தை உணர்ந்து
இருக்கிறார். இதனால் அவரை அமைதியை விரும்பும் மனிதர் என்று கூறினேன்.
என்றாலும் கிலானியை நான் கண்ணை மூடிக்கொண்டு அப்படியே நம்பிவிடவில்லை.

ஆந்திராவில்
தனித் தெலுங்கானா விவகாரத்தில் பல்வேறு தரப்பினரிடமும் கருத்து ஒற்றுமை
ஏற்படுத்தி தீர்வு காண வேண்டும். காஷ்மீர் மாநிலத்தில் குறிப்பிட்ட
பகுதிகளில் ஆயுதப்படை சிறப்பு அதிகாரச் சட்டத்தை வாபஸ் பெற வேண்டும் என
அம்மாநில முதல்-மந்திரி ஒமர் அப்துல்லா கூறியுள்ளார். இந்த விவகாரம்
தொடர்பாக பாதுகாப்பு படைகளுடன் அமர்ந்து நிதானமாக ஆலோசித்து தான் முடிவு
எடுக்க முடியும்.

இவ்வாறு மன்மோகன்சிங் கூறினார்.

சரி சரி மன்மோகனுக்கு ஆப்பு ரெடியாகி விட்டது

இதுதானே அவர்களின் கடைசி அசையாக இருந்தது இதை நோக்கிய காய்கள்தான் கடந்த காலத்தில் நகர்த்தப்பட்டது