செத்துக்கொண்டே வாழ்ந்து கொண்டிருக்கும் என் இதயத்திற்காக…

by **மீனு** Mon 21 Nov 2011 - 19:12

சில்லரை இருந்தால் கொடுத்துவிட்டுப் போ
ஓய்வு கொடுக்கிறேன் எனக்கல்ல
என்னை அடித்து அடித்தே ஓய்ந்து போன என் சாட்டைக்காக…

கொடுத்த காசுக்கு மருந்து இருந்தால் கொடுத்துவிட்டுப் போ
படுத்து உறங்குகிறேன் எனக்காக அல்ல
உனக்கு கொடுத்த காசை சேர்த்த உள்ளத்தின் நிம்மதிக்காக…

இன்றுழைத்த காசுக்கெல்லாம் சாராயம் கொடுத்து போ
குடித்து விட்டுப் போகிறேன் எனக்காக அல்ல
பள்ளி செல்லா குழந்தைக்கு என் இயலாமையை மறைப்பதற்காக…

சோரிருந்தால் கொஞ்சம் போட்டு விட்டுப் போ
தின்றுவிட்டுப் போகிறேன் எனக்காக அல்ல
ஒரு சாண் வயிற்றில் எரிந்து எரிந்தே சாம்பலான என் குடலுக்காக…

வழியிருந்தால் என் ஞாபகங்கள் அழைத்துப்போ
மறந்துவிடுகிறேன் எனக்காக அல்ல
ஆழ்மனதில் சிரித்த முகமும் வெளுத்த மனமாய் இருந்தவர்களுக்காக…

அரிசியிருந்தால் கொஞ்சம் வாயில் போட்டு விட்டுப்போ
இறந்து விடுகிறேன் எனக்காக அல்ல
செத்துக்கொண்டே வாழ்ந்து கொண்டிருக்கும் என் இதயத்திற்காக…

THANKS::ORU KAVIYIN KURAL