நிவாரணத்தில் தாமதம்; அலுவலகத்தை ஆயிரக்கணக்கானோர் மக்கள் முற்றுகை

by **நண்பன்** Tue 18 Jan 2011 - 10:45

ஆரையம்பதி கிராமத்தில் சம்பவம்

வெள்ள நிவாரணத்தை வழங்குவதில் அதிகாரிகள் தாமதம் காட்டுவதாகக் குற்றஞ்சாட்டி ஆத்திரமடைந்த பாதிக்கப்பட்ட மக்கள் கிராமத்திலுள்ள அரச அலுவலகமொன்றை முற்றுகையிட்டு அலுவலர்களைத் தாக்கியுள்ளனர்.மட்டக்களப்பிலுள்ள ஆரையம்பதிக் கிராமத்தில் நேற்று திங்கட்கிழமை இச்சம்பவம் இடம்பெற்றுள்ளது. ஆயிரத்திற்கு மேற்பட்டவர்கள் ஆரையம்பதிக் கிராமத்திலுள்ள அலுவலகத்தை சூழ்ந்து கொண்டதுடன், அலுவலக கதவை உடைத்து திறந்து உட்பிரவேசித்து தலைவரைச் சந்திக்க வேண்டுமென வலியுறுத்தியதாக ஏ.பி.செய்திச்சேவை தெரிவித்தது.

கடும் வாக்குவாதத்தைத் தொடர்ந்து ஆர்ப்பாட்டத்தில் ஈடுபட்டோர் ஊழியர்களைத் தாக்கியதுடன் சிலர் தளபாடங்களுக்குச் சேதமேற்படுத்தியுள்ளனர். இச்சம்பவத்தில் ஒரு ஊழியர் காயமடைந்துள்ளார். பொலிஸார் தலையிடும்வரை அலுவலக ஊழியர்களை உட்புறத்தில் ஆர்ப்பாட்டத்தில் ஈடுபட்டோர் தடுத்து வைத்திருந்தனர்.

சுமார் 4 ஆயிரம் பேருக்கான அரிசி,மா,பால் மா,கூடாரங்கள்,அடுப்புகள் போன்ற நிவாரணப் பொருட்கள் இதுவரை விநியோகிக்கப்படவில்லையென அப்பகுதி வாசிகள் கூறியுள்ளனர். அந்தப் பொருட்களை விநியோகிப்பதாக பொலிஸார் உறுதிமொழியளித்ததையடுத்து ஆர்ப்பாட்டத்தில் ஈடுபட்டோர் கலைந்து சென்றனர். வெள்ளம், மண்சரிவால் 40 பேர் வரை பலியாகியும் பல இலட்சக்கணக்கானோர் இருப்பிடங்களைவிட்டு இடம்பெயர்ந்தும் 4 பேர் காணாமல்போயும் இருக்கும் நிலையில் வழங்கப்பட்ட நிவாரணங்களை அதிகாரிகள் சீரான முறையில் விநியோகிக்கவில்லையென்ற குற்றச்சாட்டுகள் எழுந்துள்ளன.

பயிர்ச்செய்கைக்குத் தயாராகவிருந்த அதிகளவிலான காணிகள் வெள்ளத்தில் மூழ்கியிருப்பதுடன், கால்நடைகளும் பெருமளவு அழிந்துள்ளன. பல்லாயிரக்கணக்கான குடும்பங்கள் தமது ஜீவனோபாயத்தை இழந்திருக்கின்றன. நேற்று திங்கட்கிழமை 58 ஆயிரம் பேர் தொடர்ந்தும் முகாம்களில் தங்கியுள்ளனர். தங்களை முகாம்களை விட்டுச் செல்லுமாறு கேட்கப்பட்டிருப்பதாகவும் ஆனால், தமது வீடுகள் அழிந்துள்ள நிலையில் தமக்கு போவதற்கு இடமில்லையென சிலர் முறைப்பாடு தெரிவிக்கின்றனர்.இதேவேளை, வெள்ள பாதிப்புகளை மதிப்பீடு செய்வதற்காக ஐ.நா.வின் உயர்மட்ட அதிகாரி நாளை புதன்கிழமை வருகைதரவுள்ளார்.