பேராதனையில் மாணவர்கள் முற்றுகை போராட்டம்

பேராதனையில் மாணவர்கள் முற்றுகை போராட்டம்
கண்டி தினகரன் சுழற்சி நிருபர்
பேராதனை பல்கலைக் கழக மாணவ சங்கங்களை தடை செய்ததற்கு எதிராக நேற்று நண்பகல் உபவேந்தர் காரியாலயத்தை சுற்றிவளைத்தும் செனட் கட்டடத்துக்கு முன்பாகவும் சகல பீடங்களையும் சேர்ந்த மாணவர்கள் ஒன்றிணைந்து ஆர்ப்பாட்டம் செய்ததோடு மறியல் போராட்டத்திலும் ஈடுபட்டனர்.

நேற்று நண்பகலின் பின் சகல மாணவர்களும் தமது விரிவுரைகளை பகிஷ்கரித்தனர். நேற்று காலை விரிவுரைகளை பகிஷ்கரிக்குமாறு மாணவ சங்கங்கள் அறிவித்திருந்த போதும் மாணவர்கள் விரிவுரைகளுக்கு சமுகமளித்தனர். நண்பகலின் பின் விரிவுரைகளை பகிஷ்கரித்து போராட்டத்தில் ஈடுபட்டனர்.

எட்டு பீடங்களைச் சேர்ந்த மாணவ தலைவர்கள் மற்றும் அனைத்து பல்கலைக்கழக மாணவ சங்கத்தின் தலைவர்களும் ஆர்ப்பாட்டம் மற்றும் மறியல் போராட்டத்தின் போது செனட் கட்டடத்தின் மேல் மாடியிலிருந்து உரையாற்றினர். மாணவ சங்கங்களை தடை செய்து மாணவ போராட்டங்களை மழுங்கடிப்பதன் மூலம் எமது போராட்டத்தின் உரிமைகளை தடை செய்ய முடியாது என்று தெரிவித்தனர்.