கறுப்புப் பணம் இல்லை: பா.ஜ.க. எம்.பிக்கள் உறுதி அளிப்பார்கள் - அத்வானி

by *சம்ஸ் Tue 22 Nov 2011 - 6:25

கறுப்புப் பணம் இல்லை: பா.ஜ.க. எம்.பிக்கள் உறுதி அளிப்பார்கள் - அத்வானி
வெளிநாட்டு வங்கிக் கணக்கில் கறுப்புப் பணத்தை தாங்கள் வைத்திருக்கவில்லை என்ற உறுதிமொழியை பா.ஜ.க. தலைமையிலான தேசிய ஜனநாயகக் கூட்டணி எம்.பிக்கள் நாடாளுமன்றத்தில் அளிப்பார்கள் என்று பா.ஜ.க. மூத்த தலைவர் அத்வானி கூறினார்.

ஊழலுக்கு எதிராக மக்களுக்கு விழிப்புணர்வை ஏற்படுத்த அத்வானி மேற்கொண்ட யாத்திரை, டில்லி ராம் லீலா மைதானத்தில் ஞாயிற்றுக்கிழமை நிறைவு பெற்றது.

இந்த யாத்திரையை 22 மாநிலங்கள், 5 யூனியன் பிரதேசங்கள் வழியாக கடந்த 38 நாட்களாக அத்வானி மேற்கொண்டார். சுமார் 7,600 கி.மீ. தூரம் பயணம் செய்துள்ளார்.

ராம் லீலா மைதானத்தில் திரண்டிருந்த கட்சித் தொண்டர்களிடையே அத்வானி பேசியது: வெளிநாட்டு வங்கிக் கணக்கில் பணமோ, சட்டவிரோதமான சொத்தோ தங்களுக்கு இல்லை என்ற உறுதிமொழிக் கடிதத்தை பா.ஜ.க. தலைமையிலான தேசிய ஜனநாயகக் கூட்டணி எம்.பி.க்கள் நவம்பர் 22ம் திகதிக்குள் மக்களவைத் தலைவர் மீரா குமாரிடமும், குடியரசுத் துணைத் தலைவரும், மாநிலங்களவைத் தலைவருமான ஹமீது அன்சாரியிடமும் அளிப்பார்கள்.

ஊழலை ஒழிக்க மத்திய அரசுக்கு போதிய மன உறுதி இல்லை. பொதுமக்களுக்கு விழிப்புணர்வு ஏற்படுத்துவதன் மூலமோ, ஆட்சி மாற்றம் ஏற்படுவதன் மூலமோ தான் ஊழலை ஒழிக்க முடியும்.

ஊழலுக்கு எதிரான எனது யாத்திரை தற்போது நிறைவு பெற்றுள்ளது. ஆனால் இந்தியாவிலிருந்து ஊழல் அகற்றப்படும் வரை எனது போராட்டம் தொடரும் என்றார் அத்வானி.

இந்தக் கூட்டத்தில் பா.ஜ.க. தலைவர்கள் நிதின் கட்கரி, சுஷ்மா ஸ்வராஜ், அருண் ஜேட்லி, ராஜ்நாத் சிங், ஐக்கிய ஜனதா தளம் தலைவர் சரத் யாதவ், சிவசேனா கட்சியைச் சேர்ந்த அனந்த்கீத், இந்திய குடியரசுக் கட்சித் தலைவர் ராம்தாஸ் அத்வாலே, அ.தி.மு.க. நாடாளுமன்றக் குழுத் தலைவர் தம்பிதுரை உள்ளிட்டோர் கலந்து கொண்டனர்.

முன்னதாக டில்லி செல்லும் வழியில் காசியாபாதில் அத்வானி பேசியது: கடந்த 60 ஆண்டுகளில் 6 முறை பல்வேறு விஷயங்களுக்காக யாத்திரை சென்றுள்ளேன். ஆனால் உடல் நலிவுற்றிருக்கும் பா.ஜ.க. தலைவர் வாஜ்பாய் இல்லாமல், நான் மேற்கொண்ட முதல் யாத்திரை இதுதான் நான் மேற்கொண்ட யாத்திரைக்கு பல்வேறு மாநில மக்களிடையே மிகுந்த வரவேற்பு காணப்பட்டது.

வலுவான லோக்பால் மசோதாவை நிறைவேற்ற வேண்டும் என்பதில் உறுதியாக உள்ளேன். தொலைத் தொடர்புத் துறையில் ஊழல் செய்தது தொடர்பாக முன்னாள் மத்திய அமைச்சர் சுக்ராமுக்கு 5 ஆண்டுகள் சிறை தண்டனை விதித்த நீதிமன்றத் தீர்ப்பை வரவேற்கிறேன். ஊழலை ஒழிப்பதில் நீதித்துறைதான் சிறப்பாகச் செயல்படுகிறது என்றார் அத்வானி.