3 ஆண்டுகளில் கசாபின் செலவு ரூ. 16 கோடி மும்பை

by *சம்ஸ் Wed 23 Nov 2011 - 6:30

3 ஆண்டுகளில் கசாபின் செலவு ரூ. 16 கோடி
மும்பை:
மும்பை தாக்குதல் வழக்கின் முக்கிய குற்றவாளி அஜ்மல் கசாப்பிற்கு இதுவரை ரூ. 16 கோடி செலவிடப்பட்டுள்ளதாக மகாராஷ்டிரா அரசு தெரிவித்துள்ளது. கடந்த 2008 ஆம் ஆண்டு நவம்பர் 11 ஆம் திகதி நடந்த மும்பை தாக்குதலில் 10 பயங்கரவாதிகள் துப்பாக்கியுடன் புகுந்து அப்பாவி மக்கள் 100க்கும் மேற்பட்டோரை சுட்டுக்கொன்றனர்.

இதற்கு பதிலடியாக இந்திய கமாண்டோ படையினர் நடத்திய எதிர் தாக்குதலில் 9 பயங்கரவாதிகள் சுட்டுக் கொல்லப்பட்டனர். அஜ்மல்கசாப் என்ற பயங்கரவாதி மட்டும் உயிருடன் பிடிபட்டான். இவன் மீதான வழக்கில் சிறப்பு நீதிமன்றம் கடந்த பெப்ரவரி மாதம் மரண தண்டனை விதித்தது. தற்போது ஆர்தர் ரோடு சிறையில் அடைக்கப்பட்டுள்ளான்.

கருணை கோரி உச்சநீதிமன்றத்தில் மனு தாக்கல் செய்துள்ளான். வரும் 26 ஆம் திகதியுடன் மும்பை தாக்குதல் சம்பவத்தின் மூன்றாண்டு முடிந்து நான்காவது ஆண்டு தினம் அனுஷ்டிக்கப்படவுள்ளது.

இந்நிலையில் கடந்த மூன்று ஆண்டுகளில் கசாப்பிற்கான அனைத்து வகையான செலவுகள் குறித்த விவரங்களை மகாராஷ்டிரா உள்துறை அமைச்சகம் வெளியிட்டுள்ளது. அதில் தற்போது ஆர்தர்ரோடு சிறை சிறப்பு செல் அமைக்க ரூ. 5.3 கோடியும், கசாபின் உணவு மற்றும் அவனது பாதுகாப்பு, மருத்தவ பரிசோதனைகளை, இந்தோ திபெத் எல்லை பொலிஸார் கவனித்து வருகின்றனர்.

இதற்காக ரூ. 10.87 கோடியும், உணவுக்காக ரூ. 27 ஆயிரத்து 520, மருத்துவ சிகிச்சைக்கென ரூ. 26 ஆயிரத்து 953 என மொத்தம் மூன்று ஆண்டுகளில் ரூ. 16 கோடி ரூபாய் செலவிடப்பட்டுள்ளது.

இவ்வாறு உள்துறை அமைச்சகம் வெளியிட்டுள்ள தகவலில் தெரிவிக்கப் பட்டுள்ளது.