தற்போது வாக்கெடுப்பு நடத்தினால் ஒரு தொகுதியில்கூட ஜெயலலிதா ஜெயிக்க மாட்டார்

மது விலையை எவ்வளவு வேண்டுமானாலும் உயர்த்திடுங்கள், மக்களை கசக்கிப் பிழியும் விலை ஏற்றத்தை குறைத்திடுங்களென, ராமதாஸ் வேண்டுகோள் விடுத்தார். விழுப்புரத்தில் நடந்த கண்டன ஆர்ப்பாட்டத்தில், கட்சியின் நிறுவனர் ராமதாஸ் தலைமை தாங்கிப் பேசியதாவது:
அ.தி.மு.க., ஆட்சிக்கு வந்தால் விலைவாசி குறைக்கப்படும் என்றீர்கள். வரலாற்றில் இல்லாத விலை ஏற்றத்தைத் தந்துள்ளார்கள்.1,390 கோடி ரூபாய் அளவில் மது விலையை ஏற்றினீர்கள், நாங்கள் எதாவது வாய் திறந்தோமா. மதுவில் எவ்வளவு வேண்டுமானாலும் ஏற்றிக் கொள்ளுங்கள். மற்ற பொருட்களின் விலையை குறைத்திடுங்கள். தமிழக பட்ஜெட் 64 ஆயிரம் கோடி ரூபாய். இதில், 25 ஆயிரம் கோடி ரூபாய்க்கு திடீரென விலை உயர்த்தி மக்களை கசக்கிப் பிழியுமளவிற்கு ஏற்றி விட்டனர். தமிழகத்தில் கடந்த 2010ம் ஆண்டில் மட்டும் 16,000 விவசாயிகள் தற்கொலை செய்து கொண்டுள்ளனர். கடந்த 15 ஆண்டில் இரண்டரை லட்சம் விவசாயிகள் தற்கொலை செய்து கொண்டுள்ளனர்.

ஆடு, மாடு இலவசம் வேண்டாம். வாக்களித்த மக்களுக்கு ஜெயலலிதா விலைவாசி உயர்வு என்ற தண்டனையை கொடுத்துள்ளார். தமிழ்நாட்டில் இதுவரை வரலாறு காணாத அளவுக்கு பஸ் கட்டணம் உயர்ந்துள்ளது. கடந்த 2009ம் ஆண்டு திமுக ஆட்சியில் பால் விலை உயர்த்தப்பட்டது. அப்போது எதிர்க்கட்சியாக இருந்த ஜெயலலிதா பால்விலை உயர்வை திரும்ப பெற வேண்டும் என்றார். ஆனால் அவர் தற்போது ஆட்சிக்கு வந்தவுடன் பால் விலையை உயர்த்தியுள்ளார். 6 மாதமாக ஆட்சி நடத்தியுள்ள ஜெயலலிதா தற்போது மாதிரி வாக்கெடுப்பு நடத்தினால் ஒரு தொகுதியில்கூட ஜெயிக்க மாட்டார். இவ்வாறு ராமதாஸ் பேசினார்.