தி.மு.க. ஆட்சியில் நியமிக்கப்பட்ட 3 தகவல் கமிஷனர்கள் நியமனம் செல்லாது: சென்னை ஐகோர்ட்டு உத்தரவு

தமிழ்நாடு மாநில தகவல் கமிஷனர்களாக ஏ.ராமையா, சி.மனோகரன்,
ஏ.ஆறுமுகநயினார் ஆகியோரை நியமித்து 1.3.11 அன்று தி.மு.க. அரசு
உத்தரவிட்டது. பணியாளர் மற்றும் நிர்வாகச் சீர்திருத்தத் துறை பிறப்பித்த
அந்த உத்தரவை எதிர்த்து சென்னை ஐகோர்ட்டில் கடந்த ஆட்சியின்போது வக்கீல்
எஸ்.விஜயலட்சுமி மனு தாக்கல் செய்தார்.

மாநில
பொதுத் தேர்தல் விதிமுறைகள் நடைமுறைக்கு வந்த நிலையில் இந்த உத்தரவு
பிறப்பிக்கப்பட்டது என்றும் இவர்கள் நியமனத்தில் எதிர்க்கட்சித் தலைவரின்
(ஜெயலலிதா) கருத்து பெறப்படாமல், சட்ட விதிகளை பின்பற்றாமல், வெளிப்படையாக
இல்லாமல் ஒளிவு மறைவோடு இந்த நியமனம் நடைபெற்றுள்ளது என்றும் அதில்
கூறியிருந்தார்.

எனவே 3 பேரின் நியமனத்தை ரத்து
செய்ய வேண்டும் என்று கோரினார். இந்த வழக்கை தலைமை நீதிபதி
எம்.ஒய்.இக்பால், நீதிபதி டி.எஸ்.சிவஞானம் ஆகியோர் விசாரித்தனர். 3
பேரையும் பதவி வகிக்க தடை விதித்து உத்தரவிட்டனர். இந்த வழக்கில் தி.மு.க.
அரசுத் தரப்பில் பதில் மனு தாக்கல் செய்யப்பட்டது.

இவர்கள்
3 பேரையும் பதவி ஏற்க உத்தரவிடலாமா? வேண்டாமா? என்று தேர்தல் கமிஷனுக்கு
கடிதம் எழுதப்பட்டது என்றும் ஜெயலலிதாவுக்கு முறையாக அழைப்புக் கடிதம்
அனுப்பப்பட்டும் அவர் கலந்து கொள்ளாததால்தான் முதல்-அமைச்சரும்
(கருணாநிதி), நிதி அமைச்சரும் (க.அன்பழகன்) சேர்ந்து இந்த 3 பேரையும் தகவல்
கமிஷனர்களாக தேர்வு செய்தனர் என்றும் பதில் மனுவில் கூறப்பட்டது. இந்த
வழக்கை விசாரித்த நீதிபதிகள் நேற்று பிறப்பித்த உத்தரவு வருமாறு:-

இந்த
வழக்கு தொடர்பாக பல்வேறு ஆவணங்கள் பரிசீலிக்கப்பட்டன. தகவல் கமிஷனர்
தேர்வு நடவடிக்கைகள் 21.2.11 அன்று தொடங்கின. இதற்கான கோப்பு அன்று ஒரு
நாளிலேயே பிரிவு அலுவலர் தொடங்கி முதல்-அமைச்சர் வரை சென்றுள்ளது. கமிஷனர்
தேர்வுக்கான கூட்டம் நடத்தப்படும் தேதியை 1.3.11 என்று முதல்- அமைச்சர்
உறுதி செய்தார். இதற்காக அவர் எதிர்க்கட்சித் தலைவர் உட்பட யாருடைய
ஆலோசனையையும் பெறவில்லை.

கூட்டத் தேதி முடிவு
செய்யப்பட்ட பிறகு, அந்த கூட்டத்தில் கலந்து கொள்ள வேண்டிய மற்றொரு
அமைச்சர் யார்? என்பது பற்றி ஆலோசிக்கப்பட்டது. நிதியமைச்சரை நியமிக்க
முடிவெடுக்கப்பட்டது. அதுபற்றி நிதி அமைச்சருக்கு 24.2.11 அன்று தகவல்
கூறப்பட்டது. கமிஷனர் தேர்வுக்கான கூட்டத்தில் கலந்துகொள்வதற்காக
அப்போதைய எதிர்க்கட்சித் தலைவருக்கு (ஜெயலலிதா) அழைப்புக் கடிதம்
அனுப்பப்பட்டது.

அந்தக் கூட்டத்தை 1.3.11 அன்று
நடத்தாமல் வேறு தேதிக்கு தள்ளிவைக்கும்படி சில காரணங்களை ஜெயலலிதா
தெரிவித்திருந்தார். தேர்தல் தேதி அறிவிக்கப்படும் நிலையில் உள்ளதாலும்,
இந்திய கண்காணிப்பு கமிஷனர் நியமனம் குறித்த வழக்கு விசாரணை சுப்ரீம்
கோர்ட்டில் நிலுவையில் இருப்பதாலும் 1.3.11 அன்று கூட்டம் நடத்தாமல் வேறு
தேதிக்கு தள்ளி வைக்கும்படி அவர் தெரிவித்துள்ளார்.

1.3.11
அன்று இந்த 3 தகவல் கமிஷனர்களை நியமனம் செய்து அன்றே அதற்கான ஆணையை
வெளியிட்டு, தேர்தல் தேதி அறிவிக்கப்பட்டதை கருத்தில் கொள்ளாமல் அன்றே
கவர்னரின் ஒப்புதலையும் பெற்றுள்ளனர். 21.2.11 அன்று தயாரிக்கப்பட்ட
சுற்றறிக்கைக் குறிப்பில், தகவல் கமிஷனர் பதவிக்கு 33 பேர் விண்ணப்பித்து
இருப்பதாக கூறப்பட்டுள்ளது. ஆனால் 1.3.11 அன்று நடைபெற்ற கூட்டத்தில்
மேலும் 2 விண்ணப்பங்கள் வைக்கப்பட்டுள்ளன.

இது
அதிர்ச்சி அளிக்கிறது. அவை மனோகரன் மற்றும் ஆறுமுகநயினார் ஆகியோருடையவை.
இறுதியில் அவர்கள் தேர்வு செய்யப்பட்டனர். இது பற்றி எதிர்க்கட்சித்
தலைவர்களுக்கு தகவல் அளிக்கப்படவில்லை. இந்தப் பதவிக்கு விண்ணப்பம்
செய்யும் போது ராமையா அரசுப் பதவியில் இருந்தார் என்றும் 1.3.11 அன்றுதான்
அவருக்கு கட்டாய ஓய்வு அளிக்கப்பட்டது என்றும் மனுதாரர் கூறினார்.

இது
சட்டப்படி குற்றம் என்றும் தெரிவித்தார். இதுபோன்ற பல அம்சங்களைப்
பார்க்கும்போது, 3 பேர் நியமனத்திலும் வெளிப்படைத் தன்மை
கடைபிடிக்கப்படவில்லை என்று தெரிகிறது. இந்த 3 பேரின் நியமன உத்தரவு சட்ட
விரோதமாகவும், நடைமுறைக்கு முரணாகவும் உள்ளது. எனவே ராமையா, மனோகரன்,
ஆறுமுகநயினார் ஆகியோரை தகவல் கமிஷனராக நியமனம் செய்து கடந்த அரசு
பிறப்பித்த உத்தரவு ரத்து செய்யப்படுகிறது. இவ்வாறு அதில் கூறப்பட்டுள்ளது.


கடந்த 2010-ம் ஆண்டு தலைமை தகவல் கமிஷனராக கே.எஸ்.ஸ்ரீபதி
நியமிக்கப்பட்டார். ஆர்.பெருமாள்சாமி, டி.சீனிவாசன், சாரதா நம்பி ஆரூரன்
ஆகியோர் 17.4.08 அன்று தகவல் கமிஷனர்களாக நியமிக்கப்பட்டனர். இவர்களின்
நியமனத்தை ரத்து செய்யும்படி வி.மாதவன், சிவ இளங்கோ ஆகியோர் வழக்கு தாக்கல்
செய்தனர். இந்த வழக்கில் தலைமை நீதிபதி எம்.ஒய்.இக்பால், நீதிபதி
டி.எஸ்.சிவஞானம் ஆகியோர் பிறப்பித்த உத்தரவு வருமாறு:-


3 தகவல் கமிஷனர்கள் கடந்த 2008-ம் ஆண்டு நியமிக்கப்பட்டனர். அவர்களின் பணி
நியமனத்தை எதிர்த்து 2011-ம் ஆண்டு வழக்கு தாக்கல் செய்யப்பட்டது. இது
மிகவும் காலம் தாழ்ந்து தாக்கல் செய்யப்பட்ட வழக்கு. மேலும், அவர்களில்
ஒருவர் 23.7.11 அன்று ஓய்வு பெற்றுவிட்டார். ஸ்ரீபதியை தலைமை தகவல்
கமிஷனராக நியமித்ததில் வெளிப்படைத் தன்மை கடைபிடிக்கப்படவில்லை. சட்ட
விதிமுறைகள் மீறப்பட்டுள்ளன என்று வழக்கில் கூறப்பட்டுள்ளது.

தலைமை
தகவல் கமிஷனர் தேர்வுக்காக முதல்- அமைச்சர் (கருணாநிதி), அமைச்சர்,
எதிர்க்கட்சித் தலைவர் (ஜெயலலிதா) கொண்ட குழு அமைக்கப்பட்டது. இதில் சட்ட
விதிகள் பின்பற்றப்பட்டன. தேர்வுக் கூட்டத்தில் கலந்துகொள்வதற்கு 3.8.10
அன்று எதிர்க்கட்சித் தலைவருக்கு அழைப்பு விடுக்கப்பட்டது. ஆனால் சில
காரணங்களைக் கூறி அவர் கலந்துகொள்ளவில்லை. எனவே அவர் இல்லாமல் எடுத்த
முடிவு சட்ட விரோதம் என்று குற்றம்சாட்ட முடியாது.

இந்த
வழக்கு நிலுவையில் இருக்கும்போது, தமிழகத்தில் ஆட்சி மாற்றம் ஏற்பட்டது.
அப்போது மற்றொரு பதில்மனுவை புதிய அரசு தாக்கல் செய்தது.
ஸ்ரீபதி
நியமனத்தில் விதிகள் மீறப்பட்டதாக கடந்த அரசின் பதில் மனுவுக்கு முரணாக
புதிய அரசு கூறியது. ஆட்சி மாறினாலும் அரசின் கொள்கை நிலை மாற்றப்படக்
கூடாது. தலைமை தகவல் கமிஷனர் நியமனம் சரிதான்.

இவ்வாறு அதில் கூறப்பட்டுள்ளது.
மாலை மலர்

சட்டப்படி பார்த்து செல்லாது என்றால் அரிவித்து விட வேண்டியதுதான் ஆமா இவர்கள் இதுவரை வாங்கிய சம்பளம் திருப்பி தந்து விடுவார்களா