இலங்கை இணையத்தளங்களை விசாரணை செய்யுமாறு உயர்நீதிமன்றம் உத்தரவு

இலங்கையில் இயங்கி வரும் பதிவு செய்யப்படாத இணையத்தளங்கள் தொடர்பில் விசாரணை நடத்துமாறு தொலைதொடர்பு ஆணைக்குழுவிற்கு உயர் நீதிமன்றம் நேற்று வெள்ளிக்கிழமை(02.12.2011) உத்தரவிட்டுள்ளது.
இந்நிலையில், தற்போது இணையத்தளங்களுக்கு விதிக்கப்பட்டுள்ள தடையை நீக்குவது குறித்து கவனம் செலுத்துமாறும் நீதிமன்றம் பரிந்துரை செய்துள்ளது.

அவுஸ்திரேலியாவில் இருந்து செயற்படும் இணையத்தளமொன்று நீதிமன்றில் தாக்கல் செய்திருந்த மனு தொடர்பான விசாரணைகளின் போது இந்த உத்தரவு பிறப்பிக்கப்பட்டுள்ளது.

இணையத்தளங்கள் தொடர்பில் விசாரணை நடத்தி அறிக்கை சமர்ப்பிப்பதாக தொலைதொடர்பு ஆணைக்குழு சார்பில் ஆஜரான சட்டத்தரணி அலி சாப்ரி நீதிமன்றில் ஒப்புக்கொண்டுள்ளார்.

அரசியல் பக்கச் சார்பின்றி மூன்று மொழிகளிலும் இணைய செய்தி சேவை வழங்கி வருவதாகவும் நாளாந்தம் சுமார் 30,000 பேர் தமது இணையத்தளத்தை பார்வையிடுவதாகவும் மனுதாரர்கள் சார்பில் ஆஜரான சட்டத்தரணிகள் தெரிவித்துள்ளதுடன் எனினும், எந்தவிதமான அறிவித்தலுமின்றி திடீரென தமது இணையத்தளம் தடை செய்யப்பட்டதாக அவர்கள் குற்றம் சுமத்தியுள்ளனர்.

இதற்கு பதிலளித்த தொலைத்தொடர்கள் ஆணைக்குழு, பதிவு செய்து கொள்ளுமாறு விடுக்கப்பட்ட அறிவித்தலை உதாசீனம் செய்த காரணத்தினால் குறித்த இணையத்தளத்தை முடக்க நேரிட்டதாக நீதிமன்றில் சுட்டிக்காட்டியுள்ளமை குறிப்பிடத்தக்கது.