ஆந்திராவில் இன்று நம்பிக்கை வாக்கெடுப்பு; காங்கிரஸ் அரசை காப்பாற்றுவோம்! நடிகர் சிரஞ்சீவி

ஆந்திராவில் இன்று நம்பிக்கை வாக்கெடுப்பு; காங்கிரஸ் அரசை காப்பாற்றுவோம்!
நடிகர் சிரஞ்சீவி
ஆந்திராவில் முதல் அமைச்சர் கிரண்குமார் ரெட்டி தலைமையில் காங்கிரஸ் ஆட்சி நடந்து வருகிறது. கிரண்குமார் ரெட்டி அரசு மீது நம்பிக்கை இல்லா தீர்மானத்தை தெலுங்கு தேசம் கட்சி ஆந்திர சட்ட சபையில் தாக்கல் செய்தது. இந்த நம்பிக்கை இல்லா தீர்மானத்தின் மீது இன்று விவாதம் நடைபெற்றது. இன்று நம்பிக்கை இல்லா தீர்மானத்தின் மீது வாக்கெடுப்பு நடைபெறுகிறது.

295 உறுப்பினர்களைக் கொண்ட ஆந்திர சட்ட சபையில் 7 காலி இடங்கள் உள்ளன. எனவே 144 எம்.எல்.ஏ.க்களின் ஆதரவு இருந்தால் ஆட்சியை தக்க வைத்துக் கொள்ளலாம். காங்கிரஸ் கட்சிக்கு தற்போது 153 எம்.எல்.ஏ.க்கள் உள்ளனர். இவர்களில் 21 எம்.எல்.ஏ.க்கள் ஜெகன்மோகன் ரெட்டியின் ஓய்.எஸ்.ஆர். காங்கிரஸ் கட்சியை ஆதரிக்கிறார்கள். அவர்கள் நம்பிக்கை இல்லா தீர்மானத்தை ஆதரிக்கப் போவதாக கூறியுள்ளனர்.

எனவே காங்கிரஸ் கட்சியின் பலம் 132 ஆக குறைந்துள்ளது. ஆனால் காங்கிரஸ் கட்சியில் இணைந்த சிரஞ்சீவியின் பிரஜாராஜ்யம் கட்சிக்கு 17 எம்.எல்.ஏ.க்கள் உள்ளனர். அவர்கள் காங்கிரஸ் கட்சியை ஆதரித்தால் அதன் பலம் 149 ஆகிவிடும். நம்பிக்கை வாக்கெடுப்பில் காங்கிரஸ் கட்சியும் வெற்றி பெற்று விடும். ஆனால் சிரஞ்சீவி கட்சி எம்.எல்.ஏ.க்கள் ஆந்திர காங்கிரஸ் அரசு மீது அதிருப்தியுடன் உள்ளனர். எனவே அவர்கள் காங்கிரஸ் அரசை காப்பாற்றுவார்களா என்ற சந்தேகம் எழுந்தது. இந்த நிலையில் பிரஜா ராஜ்ஜியம் கட்சி எம்.எல்.ஏ.க்கள் கூட்டம் நடிகர் சிரஞ்சீவி தலைமையில் சனிக்கிழமை ஐதராபாத்தில் நடந்தது. கூட்டத்தில் சில எம்.எல்.ஏ.க்கள் காங்கிரஸ் அரசு மீதான தங்கள் அதிருப்தியை வெளிப்படுத்தினார்கள்.

இதையறிந்த அந்திர மாநில காங்கிரஸ் தலைவர் சத்தியநாராயணா, நடிகர் சிரஞ்சீவியை சந்தித்து பேச்சு நடத்தினார். நம்பிக்கை வாக்கெடுப்பில் காங்கிரஸ் கட்சிக்கு ஆதரவாக வாக்களிக்கும் படி கேட்டுக்கொண்டார். இந்த சந்திப்புக்கு பிறகு நடிகர் சிரஞ்சீவி நிருபர்களிடம் கூறியதாவது;

நம்பிக்கை இல்லா வாக்கெடுப்பில் இருந்து ஆந்திர காங்கிரஸ் அரசை காப்பாற்றுவதில் நாங்கள் முக்கிய பங்கு வகிக்கிறோம். ஆனால் முதல் அமைச்சர் கிரண்குமார் ரெட்டி எங்கள் கட்சி எம்.எல்.ஏ.க்களுக்கு முக்கியத்துவம் கொடுக்க வில்லை என்று பலரும் அதிருப்தியில் உள்ளனர். அதற்காக அரசை கவிழ்க்க மாட்டோம் என்று கூறினார்.

அரசியலில் இதெல்லாம் சகஜமப்பா