முல்லைப் பெரியாறு விவகாரம்: கேரளா மந்திரிகள் உண்ணாவிரதம்

முல்லைப் பெரியாறு விவகாரம்: கேரளா மந்திரிகள் உண்ணாவிரதம்
முல்லைப் பெரியாறு அணை பிரச்சினைக்காக கேரளா மந்திரிகள் 2 பேர் நேற்று முன்தினம் உண்ணாவிரதம் இருந்தனர்.

"முல்லைப் பெரியாறு அணை பலமிழந்து விட்டது. பழைய அணைக்கு பதில் புதிய அணை கட்ட வேண்டும். அதுவரை அணையின் நீர்மட்டத்தை 120 அடியாக குறைக்க வேண்டும்" என்று கேரளா வலியுறுத்தி வருகிறது.

"அணை வலுவாக இருக்கிறது. புதிய அணை கட்ட வேண்டியதில்லை. உச்ச நீதிமன்ற உத்தரவுப்படி அணையின் நீர்மட்டத்தை 142 அடியாக உயர்த்த வேண்டும்" என்று தமிழக அரசு வற்புறு த்தி வருகிறது. இது தொடர்பான வழக்கு உச்ச நீதிமன்றத்தில் நிலுவையில் உள்ளது.

புதிய அணை கட்ட வலியுறுத்தி அணை பாதுகாப்பு குழு அணை அமை ந்துள்ள சப்பாத்து பகுதியில் தொடர் உண்ணாவிரதம் இருந்து வருகிறது.

கேரளா மாநில நிதி மந்திரியும், கேரளா காங்கிரஸ் (எம்) கட்சி தலைவருமான கே.எம்.மணி நேற்று முன்தினம் சப்பாத்து பகுதிக்குச் சென்று அவர்களுடன் உண்ணாவிரதம் இருந்தார்.

இதேபோல், கேரளா மாநில நீர்ப்பாசன மந்திரி பி.ஜே. ஜோசப் டில்லியில் பிர்லா இல்லம் அருகே நேற்று முன்தினம் உண்ணாவிரதம் இருந்தார். முல்லைப் பெரியாறு அணை பிரச்சினை தொடர்பாக நடக்கும் உயர்மட்டக் குழு கூட்டத்தில் கலந்து கொள்ளச் சென்ற அவர், இந்த கூட்டத்தில் கலந்து கொள்ளாமல் புறக்கணித்து உண்ணாவிரதம் மேற்கொண்டார். நீதிமன்றத்தில் வழக்கு நிலுவையில் இருக்கும் போது உண்ணாவிரதம் இருந்தால் அது வழக்கை பாதிக்கும். ஆகவே உண்ணாவிரதம் இருக்க வேண்டாம் என்று முதல் – மந்திரி உம்மன் சாண்டி அவர்களை கேட்டுக் கொண்டார்.

ஆனால் அவர்கள், இது எதிர்ப்பு உண்ணாவிரத போராட்டம் அல்ல. பிரார்த்தனை உண்ணாவிரதம். காலவரையற்ற உண்ணாவிரதம் இருந்து வரும் போராட்டக் குழுவினருக்கு ஆதரவு தெரிவித்து உண்ணாவிரதம் இருக்கிறோம் என்று தெரிவித்தனர்.

மந்திரிகள் உண்ணாவிரதம் இருப்பதற்கு மார்க்சிஸ்ட் கட்சியின் ஆட்சி மன்ற குழு உறுப்பினர் கொடியேறி பாலகிருஷ்ணன் கண்டனம் தெரிவித்து உள்ளார். உம்மன் சாண்டியின் மந்திரி சபை கூட்டு பொறுப்பை இழந்து விட்டது. ஆகவேதான் மந்திரிகள் அவரது பேச்சை கேட்காமல் வெவ்வேறு இடங்களில் உண்ணாவிரதம் இருக்கிறார்கள் என்று அவர் கூறினார்.

இதேபோல் மந்திரி சபையில் இடம்பெற்றுள்ள கேரளா காங்கிரஸ் (பி) தலைவர் பாலகிருஷ்ண பிள்ளையும் கண்டனம் தெரிவித்து உள்ளார். மந்திரிகளோ, எதிர்க் கட்சியினரோ முல்லைப்பெரியாறுக்காக உண்ணாவிரதம் இருக்கக் கூடாது என்று அவர் தெரிவித்தார்.