சில்லரை வணிகத்தில் நேரடி அன்னிய முதலீட்டை அனுமதிக்கும் திட்டம் நிறுத்தி வைக்க மத்திய அரசு முடிவு

சில்லரை வணிகத்தில் நேரடி அன்னிய முதலீட்டை அனுமதிக்கும் திட்டத்தை, ஒருமித்த கருத்து ஏற்படும் வரை நிறுத்தி வைக்க, டெல்லியில் நேற்று நடைபெற்ற அனைத்துக் கட்சி கூட்டத்தில் முடிவு செய்யப்பட்டது. இதையடுத்து, இந்த பிரச்னை முடிவுக்கு வந்ததால் நாடாளுமன்றம் சுமுகமாக நடந்தது. சில்லரை வணிகத்தில் 51 சதவீத அன்னிய நேரடி முதலீட்டை அனுமதிக்க மத்திய அரசு முடிவு செய்ததை அனைத்துக் கட்சிகளும் கடுமையாக எதிர்த்தன.

இதை திரும்ப பெற வலியுறுத்தி, நாடு முழுவதும் போராட்டங்கள் நடத்தப்பட்டன. கடந்த மாதம் 22ம் தேதி தொடங்கிய நாடாளுமன்ற குளிர்கால கூட்டத் தொடரை எதிர்க்கட்சிகள் தொடர்ந்து அமளி செய்து முடக்கின. இரு அவைகளிலும் ஒருநாள் கூட அலுவல் எதுவும் நடக்கவில்லை. இதனால், மத்திய அரசு கவலை அடைந்தது.

இந்த நிலையில், 4 நாள் விடுமுறைக்குப் பிறகு நாடாளுமன்ற தொடர் நேற்று மீண்டும் தொடங்கியது. அதற்கு முன்பாக, மத்திய நிதியமைச்சர் பிரணாப் முகர்ஜி தலைமையில் அனைத்துக் கட்சி கூட்டம் நடந்தது. அதில், நாடாளுமன்ற கட்சிகளை சேர்ந்த எல்லா தலைவர்களும் கலந்து கொண்டனர். அதில், அன்னிய முதலீட்டை அனுமதிக்கும் முடிவு பற்றி கூட்டத்தில் காரசாரமாக விவாதிக்கப்பட்டது. பின்னர், தேசிய அளவில் ஒருமித்த கருத்து ஏற்படும் வரையில் இந்த திட்டத்தை நிறுத்தி வைக்க ஒருமனதாக முடிவு செய்யப்பட்டது.

கூட்டத்துக்குப் பிறகு இந்திய கம்யூனிஸ்ட் மூத்த தலைவர் குருதாஸ் தாஸ்குப்தா அளித்த பேட்டியில், ‘’இது மக்களுக்கு கிடைத்த வெற்றி. அன்னிய முதலீட்டை அனுமதிப்பது பற்றி அனைத்துக் கட்சிகளுடனும் ஆலோசித்து முடிவு செய்வதாக மத்திய அரசு கூறியுள்ளது. இந்த பிரச்னையை மீண்டும் எங்களிடம் கொண்டு வந்தாலும் எதிர்ப்போம். இதில் ஒருமித்த கருத்து ஏற்படாது. இந்த திட்டத்தை அமல்படுத்தவும் முடியாது’’ என்றார்.

ஐமு கூட்டணியின் முக்கிய கட்சியான திரிணாமுல் காங்கிரசை சேர்ந்த மத்திய அமைச்சர் சுதிப் பாந்தோபத்யாயா கூறுகையில், ‘‘அன்னிய முதலீட்டை அனுமதிக்கும் முடிவு நிறுத்தி வைக்கப்பட்டுள்ளது. இதை அரசு வாபஸ் பெற்றுள்ளது அல்லது நிறுத்தி வைத்துள்ளது என்று எப்படி வேண்டுமானாலும் கூறலாம். எப்படி இருந்தாலும், இந்த முடிவு அமல்படுத்தப்படவில்லை’’ என்றார்.

இதைத் தொடர்ந்து, கடந்த மாதம் 22ல் இருந்து 11 நாட்களாக செயல்படாமல் முடக்கி வைக்கப்பட்டிருந்த நாடாளுமன்றம் அமைதியாக நடந்தது. மக்களவை தொடங்கியதும் எழுந்த நிதியமைச்சர் பிரணாப் முகர்ஜி, ‘‘சில்லரை வணிகத்தில் 51 சதவீத நேரடி அன்னிய முதலீட்டை அனுமதிக்கும் முடிவு, சம்பந்தப்பட்ட எல்லா தரப்புடனும் பேசி ஒருமித்த கருத்து ஏற்படும் வரை நிறுத்தி வைக்கப்படுகிறது’’ என்று அறிக்கை ஒன்றை வாசித்தார்.

தொடர்ந்து பேசிய அவர், ‘‘இந்த முடிவை அனைத்துக் கட்சிகளும் ஏற்றுக் கொண்டது மகிழ்ச்சி அளிக்கிறது. அனைத்து மாநில முதல்வர்கள், அரசியல் கட்சிகளுடன் பேசி ஒருமித்த கருத்து ஏற்பட்ட பிறகே, இனி திட்டத்தை தொடர்வது பற்றி அரசு முடிவெடுக்கும். எனவே, நாடாளுமன்றம் அமைதியாக நடக்கட்டும்’’ என்றார்.

எதிர்க்கட்சித் தலைவர் சுஷ்மா சுவராஜ் பேசுகையில், ‘‘அன்னிய முதலீடு திட்டத்தை நிறுத்தி வைக்கும் முடிவு வரவேற்கத்தக்கது. இதனால், அரசுக்கு தோல்வி ஏற்பட்டதாக கருதக் கூடாது. மாறாக, ஜனநாயகம் வலுப்படுத்தப்பட்டு இருக்கிறது. பிரதமருக்கும் நிதியமைச்சருக்கும் நன்றி’’ என்றார். இதைத் தொடர்ந்து, கேள்வி நேரம் எடுத்துக் கொள்ளப்பட்டது. இரு அவைகளும் நாள் முழுவதும் அமைதியாக நடந்தன.

‘அரசு பணியவில்லை’

அனைத்துக் கட்சி கூட்டத்தில் கலந்து கொண்ட பிறகு நாடாளுமன்ற விவகாரத்துறை அமைச்சர் ராஜிவ் சுக்லா அளித்த பேட்டியில், ‘‘அன்னிய முதலீடு பிரச்னையில் எதிர்க்கட்சிகளுக்கும், ஐமு கூட்டணி கட்சிகளுக்கும் மத்திய அரசு பணிந்து விட்டதாக கூறப்படுவதை ஏற்க முடியாது. பணியும் பேச்சுக்கே இடமில்லை. இது, ஜனநாயக நாடு. எந்த பிரச்னையாக இருந்தாலும் நாங்கள் விவாதிக்கவே விரும்புகிறோம். அனைத்துக் கட்சி கூட்டம் அமைதியாக நடந்தது. இனிமேல், நாடாளுமன்றம் நடக்கும்’’ என்றார்.

இதுவே தற்போதைய ஆட்சி ஒரு முதுகெழும்பு இல்லாத ஆட்சி என்பதற்கு உதாரனம்