UNP யின் தலைமைப் பதவி நாடகமே! இறுதியில் வழமைபோல் புஸ்வாணம்

by *சம்ஸ் Sun 11 Dec 2011 - 6:14

போட்டி குறித்து கரு தொடர்ந்தும் மெளனம்!
ஐக்கிய தேசியக் கட்சியின் தலைவர் பதவிக்கு கரு ஜயசூரிய போட்டியிட மாட்டாராம். அதேவேளை கரு ஜயசூரிய போட்டியிடுவதற்கான உத்தியோகபூர்வமான அறிவித்தலையும் கொடுக்கவில்லையாம்.

இப்படிக் கூறுகின்றார் ஐக்கிய தேசியக் கட்சியின் பொதுச் செயலாளர் திஸ்ஸ அத்தநாயக்க. 2012 ஆம் ஆண்டிற்கான உயர்மட்ட நிர்வாகக் குழுவை தெரிவு செய்வதற்கான கூட்டம் டிசம்பர் 31 ஆம் திகதிக்கு முன் நடத்தப்படவேண்டும்.

இப்படியான நிலைமையில் சிரேஷ்ட பிரதித் தலைவரான கரு ஜயசூரிய, ரணில் விக்கிரமசிங்கவை எதிர்த்துப் போட்டி யிடவுள்ளார் எனவும் அவருக்கு ஐ. தே. க. அதிருப்தியாளர்களும் சஜித் பிரேமதாசவின் ஆதரவாளர்களும் ஆதரவளிக்கவுள்ளனர் என்றும் தெரிய வந்துள்ளது.

ஏற்கனவே இவ்வாறான ஒரு சூழல் ஏற்பட்டபோது, கட்சி இரண்டாகப் பிரியும் நிலை ஏற்பட்டது. அந்த இக் கட்டான நிலையை சமாளிப்பதற்கு சஜித் பிரேமதாசவையும் சிரேஷ்ட உபதலைவராக நியமித்து ரணில் சமாளித்துவிட்டார்.

ஆனால் இம்முறை ரணில் எதிர்ப் பாளர்கள் மிகவும் தீவிரமாக செயல்படு கின்றனர். ரணில் தனது தலைமைப் பதவியை தக்கவைத்துக் கொள்வதற்காக ஏதாவது திருகுதாளம் செய்தால் கட்சி இரண்டாகப் பிரிவதை தவிர்க்க முடியாது என அதிருப்தியாளர்கள் கூறுகின்றனர். இது தொடர்பாக ஐ. தே. க. பொதுச் செயலாளர் திஸ்ஸ அத்தநாயக்கவிடம் கேட்டபோது, இது வெறும் சலசலப்பு, வழமையானது.

கரு ஜயசூரிய எந்த ஒரு சந்தர்ப்பத்திலும் தான் ரணில் விக்கிரமசிங்கவை எதிர்த்துப் போட்டியிடப்போவதாக கூறவில்லை. இது தொடர்பாக உத்தியோகப்பூர்வமாக அறிவிக்கவில்லை என்றும் அவர் தெரிவித்தார்.

எந்தவிதமான பிரச்சினைகள் எழுந்தாலும் அதை சமாளிக்க கட்சித் தலைமை தயாராகவே இருக்கின்றது என்றும் திஸ்ஸ அத்தநாயக்க கூறினார்.