அத்துமீறி நுழையும் விமானங்களை சுட்டுவீழ்த்த பாக். இராணுவம் முடிவு

by *சம்ஸ் Tue 13 Dec 2011 - 6:13

நேட்டோ விநியோகப் பாதைக்கு தொடர்ந்தும் தடங்கல்
பாகிஸ்தான் எல்லைக்குள் அத்துமீறி நுழையும் விமானங்களை சுட்டு வீழ்த்த அந்நாட்டு இராணுவம் முடிவு செய்துள்ளது. இதற்காக பாகிஸ்தான் எல்லையில் வான் பாதுகாப்பு முறை ஒன்றை அமைக்கவும் இராணுவம் திட்டமிட்டுள்ளது.

கடந்த மாதம் பாகிஸ்தான் இராணுவ முகாம் மீது நேட்டோ நடத்திய தாக்குதலில் 24 பாக். வீரர் கொல்லப்பட்டதைத் தொடர்ந்தே இந்த நடவடிக்கை எடுக்கப்பட்டுள்ளது.

பாகிஸ்தானின் இராணுவ கொள்கையின்படி வான்வெளிக்குள் ஊடுருவும் அமெரிக்காவின் ஆளில்லா விமானங்கள் உட்பட எந்த ஒரு பொருளையும், பாகிஸ்தான் இராணுவம் உடனடியாக சுட்டுத் தள்ளிவிடும் என பாகிஸ்தான் இராணுவத்தின் மூத்த அதிகாரி ஒருவர் தெரிவித்துள்ளார்.

இதேவேளை, ஆப்கானிலுள்ள நேட்டோ படைக்கு எண்ணெய் மற்றும் உணவு விநியோகிக்கும் பாதை தொடர்ந்து அடைக்கப்பட்டுள்ளது. கடந்த நவம்பர் 26 ஆம் திகதி பாக். இராணுவ முகாம் மீது நேட்டோ நடத்திய தாக்குதலைத் தொடர்ந்து அடைக்கப்பட்ட இந்த பாதை இன்னும் திறக்கப்படவில்லை. இதனால் பாகிஸ்தான் எல்லையில் நூற்றுக் கணக்கான வாகனங்கள் தொடர்ந்து நிறுத்தி வைக்கப்பட்டுள்ளன.

அதேபோன்று கராச்சி துறைமுகத்திலும் நேட்டோ படைக்கு விநியோகிக்க வேண்டிய எண்ணெய் மற்றும் உணவுப் பொருட்களுடன் நூற்றுக் கணக்கான லொறிகள் காத்திருப்பதாக அங்கிருக்கும் அல் ஜkரா செய்தியாளர் குறிப்பிட்டுள்ளார்.

இந்நிலையில் எல்லைப் பகுதியில் நிறுத்தி வைக்கப்பட்டுள்ள எண்ணெய் லொறிகள் தாக்கப்படும் அபாயம் இருப்பதால் அவை அங்கிருந்து உடனடியாக அகற்றப்பட வேண்டும் என பலுகிஸ்தான் ஆளுநர் கோரியுள்ளார்.

கடந்த ஞாயிற்றுக்கிழமை நேட்டோவுக்கு எண்ணெய் விநியோகிக்கும் வாகனங்கள் மீது பாகிஸ்தானில் ஆயுததாரிகள் நடத்திய தாக்குதலில் மேற்படி வாகன ஓட்டுனர் ஒருவர் கொல்லப்பட்டுள்ளார்.

இதனிடையே பாகிஸ்தான் ஷம்சி முகாமில் இருந்து அமெரிக்க படை முற்றலும் வெளியேறியது. ஷம்சி தளத்தில் இருந்த 5 ஆளில்லா விமானங்கள் (டரோன்) ஆப்கானிஸ்தானில் நிறுத்தப்பட்டுள்ளதாக கூறப்படுகிறது.

மேலும், அங்கிருந்த ரேடர்கள், உட்பட பல்வேறு நவீன கருவிகளை அகற்றிவிட்டு விமான தளத்தை பாகிஸ்தான் வசம் ஒப்படைத்து விட்டதாக அமெரிக்க அதிகாரிகள் தெரிவித்தனர். தற்போது ஷம்சி தளம் பாகிஸ்தான் முழு கட்டுப்பாட்டுக்குள் வந்துவிட்டதாக அந்நாட்டு பிரதமர் யூசுப் ரசா கிலானி தெரிவித்தார்.

ஷம்சி விமான தளத்தை 1992 ஆம் ஆண்டு ஐக்கிய அரபு இராச்சியம் பாகிஸ்தானுக்கு ஒப்பந்த முறையில் வழங்கியது. அமெரிக்க இரட்டை கோபுர தாக்குதலுக்குப் பின் அதை நேட்டோ படையின் பயன்பாட்டுக்கு பாகிஸ்தான் கொடுத்தது. இந்நிலையில், ஷம்சி தற்போது பாகிஸ்தான் கட்டுப்பாட்டுக்குள் வந்ததால் மீண்டும் ஐக்கிய அரபு இராச்சியத்திடம் ஒப்படைக்க அந்நாட்டு தலைவர்கள் திட்டமிட்டுள்ளதாக கூறப்படுகிறது.