சிரிய சுயாதீனப் படை நடத்திய தாக்குதலில் 7 இராணுவ வீரர்கள் பலி

by *சம்ஸ் Thu 15 Dec 2011 - 6:07

சிரிய இராணுவத்தில் இருந்து பிரிந்து செயற்படும் சுயாதீனப்படை, இராணுவ தொடரணி மீது நடத்திய தாக்குதலில் 7 வீரர்கள் கொல்லப்பட்டுள்ளனர். இத்தாக்குதலுக்கு பதிலடியாக இராணுவத்தினர் நடத்திய துப்பாக்கிச் சூட்டில் 11 சிவிலியன்கள் கொல்லப்பட்டுள்ளதாக எதிர்ப்பாளர்கள் தெரிவித்துள்ளனர்.

சிரியாவின் இத்லிப் மாகாணத்திலேயே இச்சம்பவம் இடம்பெற்றுள்ளதாக அங்கிருக்கும் மனித உரிமை கண்காணிப்பாளர்கள் தெரிவித்துள்ளனர். இதன்போது இராணுவத்தினர் மாராட் மஸ்ரின், கப்ரி பஹ்மூல் கிராமங்களில் சரமாரியாக துப்பாக்கிச் சூடு நடத்தியதாகவும் இதில் 11 பேர் கொல்லப்பட்டதாகவும் குறிப்பிடப்பட்டுள்ளது.

இதனிடையே இராணுவத்தினர் அரச எதிர்ப்பாளர்கள் மீது நேற்று முன்தினம் நடத்திய தாக்குதல்களில் குறைந்தது 36 பேர் கொல்லப்பட்டதாக செய்தி வெளியாகியுள்ளது. இதில் இத்லிப் பகுதியில் அதிகபட்சமாக 21 பேர் கொல்லப்பட்டுள்ளதோடு ஹமாவில் 8 பேரும் ஹோம்ஸ், டெரா பகுதிகளில் 5 பேரும் பலியாகியுள்ளனர்.

சிரியாவில் ஊடகங்களுக்கு கட்டுப்பாடு விதிக்கப்பட்டுள்ளதால் அங்கிருந்து வெளியாகும் தகவல்களை சுயாதீனமாக உறுதிசெய்ய முடியவில்லை என சர்வதேச ஊடகங்கள் தெரிவித்துள்ளன.