ஈராக்கில் அமெரிக்க தேசிய கொடி இறக்கம்: யுத்தம் முடிந்ததாக அறிவிப்பு

இம்மாத இறுதிக்குள் ஈராக்கில் இருந்து அமெரிக்க வீரர்கள் முழுமையாக வெளியேற்றம்
ஈராக்கில் 9 ஆண்டு இராணுவ தலையீட்டுக்கு பின் அமெரிக்க படைகள் அங்கிருந்து முழுமையாக வெளியேறு வதையொட்டி சம்பிரதாயபூர்வமாக தேசிய கொடி இறக்கி வைக்கப்பட்டது.

ஈராக்கில் உள்ள அமெரிக்க இராணுவப் படை தலைமையகத்தில், அமெரிக்கப் படை ஈராக்கில் இருந்து விடை பெறும் வைபவம் நேற்று இடம்பெற்றது. இதில் ஈராக்கில் அமெரிக்கப் படையின் சேவை முடிந்ததைக் கணிக்கும் வகையில் அமெரிக்க கொடி இறக்கப்பட்டது.

கடந்த 2003 ஆம் ஆண்டு சதாம் ஹ¤ஸைனின் அரசுக்கு எதிராக ஈராக் மீது படையெடுத்த அமெரிக்க இராணுவம் கடந்த 9 ஆண்டுகளாக அங்கு யுத்தம் புரிந்தது. இதன்போது சுமார் 170,000 அமெரிக்க வீரர்கள் ஈராக்கில் தனது இராணுவச் செயற்பாட்டை முன்னெடுத்தது. ஈராக்கில் சுமார் 500 வெளிநாட்டு இராணுவத் தளங்கள் செயற்பட்டன.

இதுவரை காலமும் நடந்த யுத்தத்தில் சுமார் 4,500 அமெரிக்க வீரர்கள் கொல்லப்பட்டதோடு ஒரு இலட்சம் ஈராக்கியர் பலியாயினர். மேலும் 1.75 மில்லியன் பேர் இடம்பெயர்ந்தனர்.

ஈராக் யுத்தத்தில் அமெரிக்கப் படை சுமார் ஒரு டிரில்லியன் டொலரளவு செலவு செய்துள்ளது.

இந்நிலையில் இம்மாத இறுதிக்குள் அமெரிக்கப் படை முழுமையாக ஈராக்கைவிட்டு வெளியேறவுள்ளது. ஈராக்கில் மேலும் 5,500 அமெரிக்க வீரர்கள் உள்ளனர். இவர்கள் தனது கடைசி பாதுகாப்பு நடவடிக்கைகளை ஈராக் படையிடம் கையளித்துவிட்டு வெளியேறவுள்ளனர். இதேவேளை, ஈராக்கில் இருந்து வெளியேறிய அமெரிக்க வீரர்களை வரவேற்கும் வைபவம் அமெரிக்க ஜனாதிபதி பராக் ஒபாமா தலைமையில் நேற்று முன்தினம் இடம்பெற்றது. இதில் அமெரிக்க வீரர்களை தமது சொந்த நாட்டுக்கு வரவேற்பதாக கூறிய ஒபாமா, ஈராக்கில் அமெரிக்க வீரர்களின் சேவைக்கு பாராட்டு தெரிவித்தார். வடக்கு கரோலினா விமானத் தளத்தில் இடம்பெற்ற இந்த வைபவத்தில், அமெரிக்க இராணுவ வரலாற்றில் சிறப்பான அத்தியாயம் ஒன்று முடிவுக்கு வருகிறது. ஈராக்கின் எதிர்காலம் சொந்த மக்களிடம் கையளிக்கப்படும். அமெரிக்காவின் ஈராக் மீதான யுத்தம் முடிகிறது என்று அமெரிக்க ஜனாதிபதி பராக் ஒபாமா குறிப்பிட்டார்.