ஒரே நாட்டில் இரு பிரதமர்: பபுவா நியூகினியாவில் சர்ச்சை

by *சம்ஸ் Fri 16 Dec 2011 - 12:24

இந்தோனேஷியாவை ஒட்டிய நாடான பபுவா நியூ கினியாவில் இருவர் தாமே பிரதமர் என அறிவித்துள்ளதால் அங்கு அரசியல் நெருக்கடி ஏற்பட்டுள்ளது.

பபுவா நியூகினியாவில் பல ஆண்டுகளாக பிரதமராக இருந்த மைக்கல் சோமாரே கடைசியாக 2002 ம் ஆண்டு பிரதமராக தேர்ந்தெடுக்கப்பட்டார். அதில் இருந்து அவர் தொடர்ந்து பிரதமராக இருந்து வருகிறார். இந்த நிலையில் சில மாதங்களுக்கு முன்பு உடல் நலம் பாதிக்கப்பட்டார்.

எனவே, சிங்கப்பூரில் தங்கியிருந்து சிகிச்சை பெற்று வந்தார். இதனால் பீட்டர் நீல் என்பவர் தற்காலிக பிரதமராக நியமிக்கப்பட்டார். இப்போது மைக்கல் சோமாரே குணமாகி நாடு திரும்பி விட்டார். எனவே அவர் தற்காலிக பிரதமர் பீட்டர் நீல்லை பதவி விலக கேட்டுக் கொண்டார். ஆனால் அவர் பதவி விலக மறுத்து விட்டார். நான் தான் உண்மையான பிரதமர் என்று அவர் கூறி வருகிறார்.

அவருக்கு சபாநாயகர் மற்றும் பல தலைவர்கள் ஆதரவாக உள்ளனர். இதனால் பீட்டர் நீல்லை எதிர்த்து மைக்கல் சோமாரே நீதிமன்றத்தில் வழக்கு தொடர்ந்தார். இதை விசாரித்த நீதிபதி மைக்கல் சோமாரே தான் பிரதமர் என்று தீர்ப்பு கூறினார். அதன் பின்னரும் பீட்டர் நீல் பதவி விலக மறுத்துவிட்டார்.

இதனால் நாட்டில் இப்போது 2 பிரதமர்கள் உள்ளனர். இது குழப்ப நிலையை ஏற்படுத்தி உள்ளது. இந்த பிரச்சினையால் இரு தரப்பினரும் ஆதரவாளர்களும் ஆங்காங்கே மோதிக் கொண்டுள்ளனர். அங்கு அமைதியை ஏற்படுத்த அண்டய நாடான அவுஸ்திரேலியா சமசர முயற்சியில் ஈடுபட்டுள்ளது.