வடக்கு கிழக்கு இணைப்பை எதிர்க்கும் ஹிஸ்புல்லாவின் நிலைப்பாட்டை வரவேற்கிறது உலமா கட்சி!

கிழக்கை மீண்டும் வடக்குடன் இணைப்பதற்கு அரசாங்கம் துணைபோகுமாயின் அரசிலிருந்து விலகவும் தயார் என்ற பிரதி அமைச்சர் ஹிஸ்புல்லா அவர்களின் கருத்தை அகில இலங்கை உலமா கட்சி வரவேற்றுள்ளது.

இது பற்றி உலமா கட்சித் தலைவர் முபாறக் அப்துல் மஜீத் மௌலவி வெளியிட்டுள்ள அறிக்கையில் மேலும் தெரிவித்திருப்பதாவது;

வடக்கும் கிழக்கும் பிரிந்தே இருந்தன என்பதுதான் நமது நாட்டின் வரலாறாகும். ஐ.தே.க. ஆட்சிக்காலத்தில் முஸ்லிம் மக்களின் பாரிய எதிர்ப்புக்கு மத்தியில் அவை தற்காலிகமாக இரவோடிரவாக இணைக்கப்பட்டது. பின்னர் 20 வருடங்களின் பின் இறைவன் உதவியால் நீதிமன்றம் மூலம் பிரிக்கப்பட்டது.

கிழக்கை வடக்கிலிருந்து பிரிப்பதற்காக ஸ்ரீலங்கா முஸ்லிம் காங்கிரஸ் எந்த முயற்சியும் எடுக்காத நிலையில் அதற்காக குரல் கொடுக்காத நிலையில் அமைச்சர் ஏ.எல்.எம்.அதாவுல்லாவும் உலமா கட்சியுமே வடக்கிலிருந்து கிழக்கு பிரிக்கப்பட வேண்டுமென பகிரங்கமாக குரல் எழுப்பின என்பது சமகால வரலாறாகும். பின்னர் ஜே வி.பி. கட்சியினர் எடுத்துக் கொண்ட சிறந்த முயற்சியின் காரணமாக கிழக்கு மீண்டும் தனி மாகாணமாக உருவாகியது.

இன்று வடக்கிலிருந்து கிழக்கு பிரிக்கப்பட்டதால் சகல இனங்களும் சரிசமமாக வாழ்வதை கிழக்கில் காணலாம். இதனை விரும்பாத இனவாத, முஸ்லிம் விரோத சக்திகளே கிழக்கை வடக்குடன் இணைத்து தமிழ் பேரினவாத அடக்கு முறையை உருவாக்க முயல்கின்றன. அத்துடன் கிழக்கு தனியாக பிரிந்த பின் நடத்தப்பட்ட தேர்தலில் கலந்து கொள்ளாமல் இருந்ததன் விளைவை உணர்ந்த த.தே.கூட்டமைப்பினர் மீண்டும் தேர்தல் வந்தால் எந்த முகத்துடன் போட்டியிடுவது என்ற வெட்கத்தின் காரணமாகவும் வடக்கு கிழக்கை இணைத்தால் மாகாண சபை தேர்தலில் போட்டியிட முடியும் என்பதை முன்வைப்பதற்காகவுமே இதனை இணைக்கக்கோருகின்றனர்.

இத்தகைய பின்னணியில் வடக்கு கிழக்கு இணைப்பின் மோசமான விளைவை நன்கு உணர்ந்த கூற்றாகவே பிரதி அமைச்சர் ஹிஸ்புள்ளாவின் கூற்றை நாம் பார்க்கிறோம். அவரது கருத்து வரவேற்புக்குரியதும் பாராட்டுக்குரியதுமாகும். ஏனைய முஸ்லிம் அமைச்சர்களும் இவ்வாறான கருத்தையே கொண்டிருக்க வேண்டும் என்பது எமது எதிர்பார்ப்பாகும்.

அவரது இக்கூற்றை பொறுக்க முடியாத கூட்டமைப்பு பாராளுமன்ற உறுப்பினர் ஒருவர் ஹிஸ்புள்ளாவை தனிப்பட்ட வகையிலும் விமர்சித்திருப்பது அவரது அநாகரிக அரசியலையும் துவேஷத்தையுமே காட்டுகிறது. ஹிஸ்புள்ளாவின் கருத்து பிழையாயின் அக்கருத்து எந்த வகையில் பிழை என்பதையே சுட்டிக் காட்டியிருக்க வேண்டும். அதனை விடுத்து அவர் பற்றி தனிப்பட விமர்சித்த பாராளுமன்ற உறுப்பினரின் கூற்று கண்டிக்கத்தக்கதாகும்.