பிலிப்பைன்ஸில் புயல், வெள்ளம்; பலி எண்ணிக்கை 500 ஆக அதிகரிப்பு

by *சம்ஸ் Mon 19 Dec 2011 - 6:28

பிலிப்பைன்ஸில் வீசிய கடும் புயல் மற்றும் வெள்ளத்தினால் கொல்லப்பட்டோர் எண்ணிக்கை 500 ஐ எட்டியுள்ளது. மேலும் 250 பேருக்கும் மேற்பட்டோர் காயமடைந்துள்ளனர்.

கடந்த வெள்ளிக்கிழமை இரவு பிலிப்பைன்சில் புயல் வீசியதோடு, மழை, வெள்ளமும் ஏற்பட்டது.

இதில் ககயன் தி ஓரோ என்ற ஊரில் மட்டும் 215 பேர் இறந்துள்ளதாகத் தகவல்கள் கூறுகின்றன. இலிகன் என்ற ஊரில் 144 பேர் உயிரிழந்துள்ளார்கள் என்று கூறப்படுகிறது. கடந்த 12 மணி நேரமாகப் பெய்து வரும் கன மழையினால் ஏற்பட்ட வெள்ளப் பெருக்கில் பல வீடுகள் மூழ்கியுள்ளன. இரவு மழை வலுத்ததில் திடீரென்று வெள்ளப் பெருக்கு ஏற்பட்டு பல வீடுகள் கடலுக்குள் அடித்துச் செல்லப்பட்டுள்ளன. இதனால் உறங்கும்போதே பலர் உயிரிழந்ததாகத் தெரிகிறது. மலைப் பகுதிகளில் ஏற்பட்ட நிலச் சரிவில் பல வீடுகள் நாசமடைந்துள்ளதாக அதிகாரிகள் தெரிவித்தனர்.

ஆயிரக் கணக்கான இராணுவ வீரர்கள் மீட்புப் பணியில் ஈடுபடுத்தப்பட்டுள்ளனர். சர்வதேச செஞ்சிலுவைச் சங்க தொண்டர்களும் மீட்புப் பணியில் இறங்கியுள்ளனர். இந்நிலையில் 35,000 பேர் அளவில் தற்காலிக முகாம்களில் தங்க வைக்கப்பட்டுள்ளனர். மேலும் நூற்றுக் கணக்கானோர் காணாமல் போயுள்ளனர். இவர்களை தேடும் பணியில் 20,000 இராணுவ வீரர்கள் ஈடுபட்டுள்ளனர்.