தென் கொரியாவில்; உஷார்; நிலையில் இராணுவம்; நிலைமையை தீவிரமாக கண்காணிக்கிறது அமெரிக்கா

தென் கொரியாவில்; உஷார்; நிலையில் இராணுவம்; நிலைமையை தீவிரமாக கண்காணிக்கிறது அமெரிக்கா
வட கொரிய தலைவர் கிம் ஜொங் இல் மரணமடைந்ததைத் தொடர்ந்து அயல் நாடான தென் கொரியாவில் இராணுவம் உஷார்படுத்தப்பட்டுள்ளது. வட கொரியாவை ஒட்டிய எல்லையில் தென் கொரிய இராணுவத்தினர் குவிக்கப்பட்டுள்ளனர்.

தென் கொரிய ஜனாதிபதி
லீ மியுங் – பக்

வட கொரிய தலைவர் மரணமடை ந்ததாக அந்நாட்டு தேசிய தொலைக்காட்சி அறிவித்ததைத் தொடர்ந்து தென் கொரிய தேசிய பாதுகாப்பு கவுன்சில் கூட்டம் அவசரமாகக் கூட்டப்பட்டது.

இதில் தென் கொரிய இராணுவத்தை உஷார் நிலையில் இருக்குமாறு கோரப்பட்டதோடு, அரச அதிகாரிகளுக்கு அவசர நிலை அறிவிக்கப்பட்டது. இதன் மூலம் அரச அதிகாரிகளுக்கு விடுமுறை எடுப்பதற்கு கட்டுப்பாடு விதிக்கப்பட்டது.

அனைத்து அரச அலுவலகங்களும் அவசர நிலையில் செயற்படும் என தென் கொரிய ஜனாதிபதி அலுவலகம் குறிப்பிட்டுள்ளது.

அத்துடன் நாட்டு மக்களுக்கு அமைதி காக்கும்படி தென் கொரிய ஜனாதிபதி லீ மியுங் – பக் கேட்டுக்கொண்டுள்ளார். மக்களுக்கு வழமையான வர்த்தக செயற்பாடுகளில் ஈடுபடுமாறும் குழப்பம் அடையத் தேவையில்லை எனவும் தென்கொரிய ஜனாதிபதி கோரிக்கை விடுத்துள்ளார்.

மூன்று வருட யுத்தத்திற்கு பின்னர் 1953 ஆம் ஆண்டு பிரிந்த வட, தென் கொரிய நாடுகளுக்கு இடையில் தொடர்ந்து மோதல் இடம்பெற்று வருகிறது. இந்நிலை அண்மைக் காலமாக தீவிரமடைந்துள்ளது.

இதனிடையே கிம் ஜொங் இல் மரணமடைந்ததாக அறிவிக்கப்பட்டு இரண்டு மணி நேரத்திற்குள் அமெரிக்க ஜனாதிபதி பராக் ஒபாமா தென் கொரிய ஜனாதிபதியை தொலைபேசியின் மூலம் தொடர்பு கொண்டு நிலவரங்கள் குறித்து பேச்சுவார்த்தை நடத்தியுள்ளார். இதன்போது இரு நாட்டு தலைவர்களும் வடகொரியாவின் நிலவரம் குறித்து உன்னிப்பாக கவனம் செலுத்த தீர்மானித்ததாக தென்கொரிய ஜனாதிபதி அலுவலகம் குறிப்பிட்டுள்ளது.

இதேபோன்று தென் கொரிய ஜனாதிபதி லீ, ஜப்பான் பிரதமர் யொஷிடா நொடாவை தொலைபேசி யூடாக தொடர்புகொண்டு வடகொரிய நிலவரம் குறித்து ஆலோசித்துள்ளார்.

இதேவேளை, தென் கொரிய பிராந்தியத்தில் நிலைகொண்டிருக்கும் 28,500 அமெரிக்க துருப்புகளுக்கு வடகொரிய நிலவரம் குறித்து உஷார் நிலையில் இருக்குமாறும், இது குறித்து செய்மதி, விமானங்கள் மூலம் கண்காணிக்குமாறும் கோரப்பட்டுள்ளது.

இது தொடர்பில் தென்கொரிய பாதுகாப்பு அமைச்சின் பேச்சாளர் ஏ. எப். பி. செய்திச் சேவைக்கு கூறும்போது, தென் கொரிய எல்லைப் பகுதியின் பாதுகாப்பு பலப்படுத்தப்பட்டு கண் காணிப்பு நடவடிக்கைகள் முன்னெடுக்கப்ப ட்டுள்ளன.வடகொரிய இராணுவத்தின் எந்த நகர்வுக்கும் நாம் தயாராகவே உள்ளோம் என்றார். இந்நிலையில் கிம்மின் மரணத்தை தொடர்ந்து ஆசிய பங்குச் சந்தைகளில் பெரும் சரிவு ஏற்பட்டது.

இதனிடையே கிம் ஜொங் இல்லின் மரணத்திற்கு சீனா, ரஷ்யா தனது கவலையை வெளியிட்டுள்ளன.

தேசத்தின் நல்ல நண்பன் ஒருவரை இழந்துவிட்டதாக இரு நாடுகளும் குறிப்பிட்டுள்ளன.

இதேபோன்று தனது அனுதாபத்தை வெளியிட்டுள்ள ஜப்பான் அரசு, கிம் ஜொஸ் இல்லின் மரணம் அந்நாட்டிற்கு பாதகமான விளைவுகளை ஏற்படுத்தாமல் இருக்க பிரார்த்தித்துள்ளது.