ஈராக்கிய உப ஜனாதிபதியை கைதுசெய்ய உத்தரவு

by **முனாஸ் சுலைமான்** Wed 21 Dec 2011 - 6:22

ஈராக்கிய உப ஜனாதிபதி தாரிக் அல் ஹஷிமியை கைதுசெய்யுமாறு அந்நாட்டு நீதிபதிகள் குழாமொன்று உத்தரவு பிறப்பித்துள்ளது. பயங்கரவாத நடவடிக்கைகளில் ஈடுபட்டதாக அவர் மீது குற்றம் சுமத்தப்பட்டுள்ளது.
ஈராக்கிய அரசாங்க மற்றும் பாதுகாப்பு அதிகாரிகள் மீது குண்டுத் தாக்குதல் நடத்தத் திட்டமிடப்பட்டதாக மேற்படி பிடிவிறாந்தில் குறிப்பிடப்பட்டுள்ளது.
உப ஜனாதிபதி அல்ஹஷிமியின் உத்தரவின் பேரில் தாம் தாக்குதல்களை மேற்கொண்டதாக அவரின் மெய்ப்பாதுகாவலர்கள் ஒப்புக்கொண்டுள்ளனர் என ஈராக்கிய உள்துறை அமைச்சு தெரிவித்துள்ளது.
இப்பிடிவிறாந்து உத்தரவில் 5 நீதிபதிகள் கையெழுத்திட்டுள்ளதாகவும் அது அமுல்படுத்தப்பட வேண்டும் எனவும் உள்துறை அமைச்சு பேச்சாளர் மேஜர்ஜெனரல் ஆதில் தஹாம் கூறினார்.
ஈராக்கிலிருந்து அமெரிக்கப் படையினர் வெளியேறி ஓரிரு தினங்களில் இப்பிடிவிறாந்து உத்தரவு வெளியாகியுள்ளமை குறிப்பிடத்தக்கது.
இவ்விவகாரம் ஈராக்கிய ஷியா, சுன்னி சமூக பிளவுகளை மேலும் தூண்டும் எனக் கருதப்படுகிறது.
உப ஜனாதிபதி அல் ஹஷிமி ஈராக்கிய சிறுபான்மை சுன்னி முஸ்லிம் சமூகத்தைச் சேர்ந்தவராவார். ஏற்கெனவே, ஷியா சமூகத்தைச் சேர்ந்த பிரதமர் நூரி அல் மலிக்கிக்கும் சுன்னி சமூக அரசியல் தலைவர்களுக்கும் அரசியல் அதிகார பங்கீடு தொடர்பாக தகராறு நிலவுகிறது.
இந்நிலையில் உப ஜனாதிபதி தாரிக் அல் ஹஷிமி தற்போது குர்திஷ் மாகாண நகரமான இர்பில்லில் தஞ்சம் புகுந்துள்ளார். குர்திஷ் பிராந்தியத்திற்கு உள்ள சுயாட்சி காரணமாக அங்கு வைத்து ஹசிமியை பிரதமர் அல் மலிக்கியின் படைகள் கைது செய்வது கடினம் எனத் தெரிவிக்கப்படுகிறது.
தன் மீதான குற்றச்சாட்டு குறித்து தான் அதிர்ச்சியடைந்துள்ளதாகவும் தான் எந்தத் தவறையும் செய்யவில்லை எனவும் இர்பில் நகரில் நேற்று நடைபெற்ற செய்தியாளர் மாநாடொன்றில் அல் ஹஷிமி தெரிவித்தார்.
தான் ஈராக்கைவிட்டு தப்பிச் செல்லப்போவதில்லை எனக் கூறியுள்ள அவர், பாக்தாத்தை விட குர்திஷ்தான் மாகாணத்தில் வழக்கை எதிர்கொள்ள விரும்புவதாக கூறியுள்ளார்.
தனது பாதுகாப்புக்கு ஈராக்கிய ஜனாதிபதி ஜலால் தலபானி உறுதியளித்துள்ளதாகவும் உப ஜனாதிபதி அல் ஹஷிமி கூறினார். ஈராக்கிய ஜனாதிபதி ஜலால் தலபானி குர்திஷ் சமூகத்தைச் சேர்ந்தவர் என்பது குறிப்பிடத்தக்கது.
இவ்விவகாரம் தொடர்பாக பிரதமர் அல் மலி;க்கியின் பேச்சாளர் ஒருவர் கூறுகையில், 'இப்பிடிவிறாந்தானது நீதித்துறையினரால் பிறப்பிக்கப்பட்டது. இது ஓர் அரசியல் விவகாரமல்ல' எனக் கூறியுள்ளார்.