வட கொரியாவின் அடுத்த தலைவராக இல் - லின் மகன் கிம் ஜங் உன் நியமனம்

வட கொரியாவின் அடுத்த தலைவராக இல் - லின் மகன் கிம் ஜங் உன் நியமனம்
தென் கொரியா தொடர்ந்தும் உஷார் நிலையில்
வட கொரிய தலைவர் கிம் ஜொங் இல்லின் மரணத்தைத் தொடர்ந்து அந்நாட்டின் புதிய தலைவராக இல்லின் மூன்றாவது மற்றும் கடைசி மகன் கிம் ஜொங் உன் நியமிக்கப்படவுள்ளதாக செய்தி வெளியாகியுள்ளது.

வட கொரியாவின் ஆளும் தொழிலாளர் கட்சி புதிய தலைவராக கிம் ஜொங் உன்னை நியமித்துள்ளதாக அந்நாட்டின் அரச தொலைக்காட்சி அறிவித்துள்ளது. நாட்டின் அடுத்த தலைவரான உன்னின் பின்னால் நாம் அணி திரண்டு நமது ஒற்றுமையை காட்ட வேண்டும் என அரச செய்தி நிறுவனமான கே. சி. என். ஏ. மக்களை கேட்டுக் கொண்டுள்ளது.

எனினும் கிம் ஜொங் உன் பற்றி மிகக் குறைந்த தகவல்களே இதுவரை வெளிவந்திருக்கின்றன. இவர் முதல் முறையாக கடந்த ஆண்டு செப்டம்பர் மாதமே பொது மக்கள் முன் அறிமுகமானார்.

இவரது வயது 27, 28 மற்றும் 30 என பல ஊடகங்களும் முரணாக செய்தி வெளியிட்டுள்ளன.

இவர் சுவிட்சர்லாந்தில் கல்வி கற்றவர் எனும் அந்நாட்டு இராணுவத்தில் நான்கு நட்சத்திரம் கொண்ட ஜெனரல் பதவியில் இருப்பவர் என்றும் செய்திகள் குறிப்பிடுகின்றன.

இதனிடையே வட கொரியாவின் புதிய தலைவர் நாட்டை சமாதான வழியில் கொண்டு செல்வார் என தாம் எதிர்பார்ப்பதாக அமெரிக்க இராஜாங்கச் செயலாளர் ஹிலாரி கிலின்டன் குறிப்பிட்டார். அத்துடன் வட கொரிய மக்களுக்கு உதவத் தயாராக இருப்பதாகவும் அவர் குறிப்பிட்டார்.

இதேவேளை கடந்த சனிக்கிழமை மரணமடைந்த கிம் ஜொங் இல்லின் உடல் நேற்று பொது மக்கள் பார்வைக்கு வைக்கப்பட்டுள்ளது. இது தொடர்பான காட்சிகளை அந்நாட்டு அரச தொலைக்காட்சி நேற்று வெளியிட்டது. இதன் போது கிம் ஜொங் இல் லின் மகன் கிம் ஜொங் உன் மற்றும் வட கொரிய அரசின் உயர் அதிகாரிகளும் அவரது உடலுக்கு இறுதி அஞ்சலி செலுத்தும் காட்சிகள் ஒளிபரப்பப்பட்டன.

கிம் ஜொங் இல் லின் மரணம் குறித்த செய்தியை நேற்று முன்தினமே அந்நாட்டு அரசு அறிவித்தது. இதனையொட்டி வடகொரியாவில் கடந்த 17 ஆம் திகதி முதல் எதிர்வரும் 28 ஆம் திகதி வரை துக்க தினம் அனுஷ்டிக்கப்பட்டு வருகிறது. வரும் 28 ஆம் திகதி கிம் ஜொங் இல் லின் இறுதிக் கிரியைகள் இடம் பெறவுள்ளன.

இந்நிலையில் கிம் ஜொங் இல் லின் மரணத்திற்கு அனுதாபம் வெளியிட்டுள்ள கியூபா அரசு, இதனை யொட்டி கியூபாவில் மூன்று நாள் துக்கதினம் அனுஷ்டிக்கப்படும் எனவும் அறிவித்துள்ளது.

அதேபோன்று சீன ஜனாதிபதி ஹ¤ ஹின்டாவொ நேற்று பீஜிங்கிலுள்ள சீன தூதரகத்திற்கு சென்று தனது அனுதாபத்தை வெளியிட்டார்.

மறுபுறத்தில் அயல் நாடான தென் கொரியா தொடர்ந்தும் தனது இராணுவத்தை உஷார் நிலையிலேயே வைத்துள்ளது. அத்துடன் வட கொரிய ஜனாதிபதியின் மரணத்திற்கு எவ்வாறு செயற்படுவது என்பது குறித்து தென் கொரிய ஜனாதிபதி லீ மியுங் - பக் நேற்றைய தினம் தனது உயர் மட்ட அமைச்சர்களுடன் ஆலோசித்துள்ளார்.

இந் நிலையில் வட கொரியாவை ஒட்டிய தென் கொரிய எல்லையில் பிரமாண்டமான கிறிஸ்மஸ் மரத்தை அமைக்கும் திட்டத்தை தென் கொரிய அரசு விலக்கிக் கொள்ளும் என அங்கிருந்து வரும் செய்திகள் குறிப்பிடுகின்றன.

இதில் வட கொரிய தலைவரின் மரணம் குறித்து முன் கூட்டியே செய்திகள் தெரிய வராதது குறித்து தென்கொரிய உளவுப் பிரிவு மீது அந்நாட்டு அரசு குற்றம் சாட்டியுள்ளது. இந்த தவறை தென்கொரிய உளவுப் பிரிவுத் தலைவர் செய் ஹ¤ன் ஒப்புக் கொண்டுள்ளார். இது குறித்து அவர் தென்கொரிய பாராளுமன்ற குழு முன் நேற்று விளக்கமளித்தார். அதில் வட கொரிய அரசு அறிவித்துத் தான் தனக்கு இந்த செய்தி தெரியும் என குறிப்பிட்டார்.

வட கொரிய தலைவர் கிம் ஜொங் இல் கடந்த சனிக்கிழமை மரணமடைந்தாலும் அது குறித்த செய்தியை அந்நாட்டு அரசு இரண்டு நாள் கழித்து நேற்று முன்தினமே வெளியிட்டது.

இதேவேளை, கிம் ஜொங் இல் மரணமடைந்ததாக அறிவிப்பு வெளியான நேற்று முன்தினம் வட கொரியா ஏவுகணை சோதனையும் மேற்கொண்டுள்ளது. குறைந்த தூரம் சென்று இலக்கை தாக்கும் ஏவுகணை சோதனை வெற்றிகரமாக நடத்தப்பட்டது என தொலைக்காட்சிகள் செய்தி வெளியிட்டன.

இது குறித்து இராணுவ அதிகாரிகள் எந்த தகவலும் வெளியிடவில்லை. எனினும் வடக்கு கடற்கரை பகுதியில் ஏவுகணை சோதனை நடத்தப்பட்டதாக யான் ஹாப் தொலைக்காட்சி தெரிவித்தது.

உலகின் 5 ஆவது மிகப் பெரிய இராணுவத்தை கொண்ட வட கொரியா அணு ஆயுத சோதனையும் மேற்கொண்டுள்ளது.

இதனால் அங்கு ஏற்படும் ஆட்சி மாற்றம் குறித்து சர்வதேச நாடுகள் உன்னிப்பாக கவனம் செலுத்தி வருகின்றமை குறிப்பிடத்தக்கது.