பகவத் கீதைக்கு தடை கோரிய வழக்கால் லோக்சபாவில் சர்ச்சை

by *சம்ஸ் Wed 21 Dec 2011 - 6:27

புதுடில்லி:
பகவத் கீதைக்கு தடை கோரி ரஷ்ய நீதிமன்றத்தில் வழக்கு தொடர்ந்திருப்பதை எதிர்த்து சபை உறுப்பினர்கள் கோஷம் போட்டதால் லோக்சபா நேற்று முன்தினம் ஒத்திவைக்கப்பட்டது.

இந்துக்களின் புனித நூலாகக் கருதப்படும் பகவத் கீதைக்கு பலர் விளக்கம் எழுதியுள்ளனர். இஸ்கான் அமைப்பின் நிறுவனர் பக்தி வேதாந்த சுவாமி பிரபு பாதாவும், பகவத் கீதைக்கு விளக்கம் எழுதியுள்ளார். இவர் எழுதிய பகவத் கீதை நூலுக்கு தடை கோரி ரஷ்யாவின் டோம்ஸ்க் நீதிமன்றத்தில் வழக்கு தொடரப்பட்டுள்ளது.

இந்த விவகாரம், லோக்சபாவில் நேற்று முன்தினம் புயலை கிளப்பியது. ராஷ்டிரிய ஜனதா தள தலைவர் லாலு பிரசாத் எழுந்து "பகவான் கிருஷ்ணரையோ, பகவத் கீதையையோ அவமானப் படுத்துவதை ஏற்க முடியாது. இதற்கு மத்திய அரசு ரஷ்யாவுக்கு கடும் கண்டனம் தெரிவிக்க வேண்டும்" என்றார்.

பிஜு ஜனதா தள உறுப்பினர் பத்ருஹரி மகாதப் குறிப்பிடுகையில், "மாஸ்கோவில் உள்ள இந்தியத் தூதரகம், பகவத் கீதை தவறான எதையும் போதிக்கவில்லை என்பதை அந்நாட்டு அரசுக்கு எடுத்துக் கூற வேண்டும்" என்றார்.

இதே கோரிக்கையை வற்புறுத்தி பாரதிய ஜனதா, பகுஜன் சமாஜ் கட்சி, சிவசேனா, சமாஜ்வாடி கட்சி உறுப்பினர்களும் கோஷம் எழுப்பினர். "இது குறித்து முறைப்படி கடிதம் கொடுத்த பின் விவாதிக்கலாம்" என சபாநாயகர் மீராகுமார் தெரிவித்தார். ஆனால் உறுப்பினர்கள் சமாதானம் அடையாததால் சபை மதியம் 2 மணி வரை ஒத்தி வைக்கப்பட்டது.

ரஷ்யாவில் நடந்தது என்ன?

ரஷ்யாவின் "கிறிஸ் டியன் ஆர்த்தோடக்ஸ் சர்ச்" சைபீரியாவின் டோம்ஸ்க் நகரில் உள்ள நீதிமன்றத்தில் சமீபத்தில் ஒரு குறிப் பிட்ட பகவத் கீதை பிரசுரத்தைத் தடை செய்யக் கோரி வழக்கு தொடர்ந்தது. சர்ச் தன் மனுவில் அந்த பிரசுரம், வன்முறை யைத் தூண்டும் இலக் கியமாக இருப்பதால் அதை தடை செய்ய வேண்டும் எனக் கோரியுள்ளது.

இந்தியாவின் மிகப் பிரபல கிருஷ்ண பக்தி இயக்கமான இஸ்கான் அமைப்பின் நிறுவனர் பக்தி வேதாந்த பிரபு பாதா எழுதிய கீதை விளக்க உரையைத் தான் சர்ச் தனது மனுவில் தடை செய்யக் கோரியிருந்தது. இவ்வழக்கின் இறுதித் தீர்ப்பு நேற்று முன்தினம் வெளிவருவதாக இருந்த நிலையில் டோம்ஸ்க் நீதிமன்றம் இம்மாதம் 28ம் திகதி தீர்ப்பை வழங்குவதாக நேற்று முன்தினம் அறி வித்தது.