இந்துக்களின் புனித நூலான பகவத் கீதைக்கு ரஷ்ய நீதிமன்றம் தடை விதிக்க மறுப்பு

இந்துக்களின் புனித நூலான பகவத் கீதைக்கு தடை விதிக்க மறுப்பு தெரிவித்து, மனுவை ரஷ்ய நீதிமன்றம் நேற்று தள்ளுபடி செய்தது. மகாபாரத புராணத்தில் அர்ஜுனனுக்கு கிருஷ்ணர் உபதேசித்தது பகவத் கீதை. வாழ்க்கை நெறிகளை கூறும் அது, இந்து மதத்தின் புனித நூலாக கருதப்படுகிறது.
கிருஷ்ணரின் புகழ் பரப்பும் சர்வதேச அமைப்பான ‘இஸ்கான்’ அமைப்பின் நிறுவனர் பக்திவேதாந்த சுவாமி பிரபுபாதா, பகவத் கீதையை ரஷ்ய மொழியில் மொழி பெயர்த்துள்ளார்.

‘பகவத் கீதா அஸ் இட் வாஸ்’ என்ற பெயரிலான அந்த புத்தகத்தை வெளியிட தடை விதிக்க கோரி ரஷ்யாவின் சைபீரிய டாம்ஸ்க் நகர நீதிமன்றத்தில் கடந்த ஜூனில் வழக்கு தொடரப்பட்டது. பகுத்தறிவுக்கு ஒவ்வாத இந்த புத்தகத்தை தடை செய்வதுடன் சமூக நல்லிணக்கத் துக்கு எதிரானது என்று அறிவிக்கவும் மனுவில் கோரப்பட்டது.
இது, உலகம் முழுவதும் உள்ள இந்துக்களிடம் கொந்தளிப்பை ஏற்படுத்தியதுடன், இந்திய நாடாளுமன்றத்திலும் எதிரொலித்தது. இப்பிரச்னைக்கு தீர்வு காண கோரி மத்திய வெளியுறவு அமைச்சர் எஸ்.எம்.கிருஷ்ணா, இந்தியாவுக்கான ரஷ்ய தூதர் அலெக்ஸாண்டர் கடாகின்னிடம் வலியுறுத்தினார்.

இந்நிலையில், இந்த வழக்கின் இறுதி விசாரணை டாம்ஸ்க் நீதிமன்றத்தில் நேற்று நடந்தது. ‘ரஷ்ய அரசால் தடை செய்யப்பட்டுள்ள 1000க்கும் மேற்பட்ட புத்தகங்களில் பகவத் கீதை இடம் பெறாததாலும், வாழ்க்கை நெறிகளை கூறும் புத்தகம் என்பதாலும் பகவத் கீதைக்கு தடை விதிக்க முடியாது. எனவே, மனுவை தள்ளுபடி செய்கிறோம்’ என்று நீதிபதிகள் தீர்ப்பளித்தனர்.

இந்த தீர்ப்புக்கு வெளியுறவு அமைச்சர் எஸ்.எம்.கிருஷ்ணா வரவேற்பு தெரிவித்துள்ளார். மேலும், பகவத் கீதை மீது எழுந்த சர்ச்சைக்கு சுமூக தீர்வு ஏற்பட உதவிய ரஷ்ய அரசுக்கு நன்றி தெரிவிப்பதாக கூறினார். ரஷ்ய நீதிமன்ற தீர்ப்பை கேட்டு, இந்துக்கள் மகிழ்ச்சி அடைந்துள்ளனர். 6 மாதங்களாக நீடித்த வழக்கில் வெற்றி கிடைத்தது மகிழ்ச்சியளிக்கிறது என்று இஸ்கான் தலைவர் சாது பிரியா தாஸ் தெரிவித்தார்.