மெட்ரோ ரயில் சுரங்கம் தோண்ட, சீன இன்ஜினியர்கள்

சுரங்கப்பாதை அமைப்பதற்கு, வண்ணாரப்பேட்டை மற்றும் ஷெனாய் நகர், மெட்ரோ ரயில் நிலையங்களுக்கு சுரங்கம் தோண்டும் எந்திரங்கள் (டனல் போரிங் மிஷின்கள்), நேற்று அதிகாலை வந்தடைந்தன.
இம்மிஷின்களை இயக்குவதற்கு, சீனாவிலிருந்து இன்ஜினியர்கள் ஜனவரி மாதம் சென்னை வருகிறார்கள்.

சென்னை மெட்ரோ ரயில் பாதை திட்டத்தில் முதல் கட்டமாக, வண்ணாரப்பேட்டை மற்றும் ஷெனாய் நகர் திரு.வி.க., பூங்கா ரயில் நிலையத்திலிருந்து சுரங்கப்பாதை அமைக்கும் பணி துவங்குகிறது. சுரங்கம் தோண்டுவதற்காக, சீனாவிலிருந்து வரவழைக்கப்பட்ட இரண்டு டனல் போரிங் மிஷின்கள் மற்றும் இணைப்பு உபகரணங்கள், கடந்த வாரம் கப்பலில், சென்னை துறைமுகம் வந்தடைந்தன.இவைகளில் இணைப்பு உபகரணங்கள், மூன்று நாட்களுக்கு முன்பு வண்ணாரப்பேட்டை, ஷெனாய்நகர் நிலையங்களுக்கு கன்டெய்னர்களில் அனுப்பி வைக்கப்பட்டன.

சென்னை துறைமுகத்திலிருந்து இந்த இரண்டு நிலையங்களுக்கும் சுரங்கம் தோண்டும் மிஷின், நேற்றிரவு அனுப்பி வைக்கப்பட்டன. மிஷின் அமைப்பு பெரிய அளவிலும், 170 டன்னுக்கு மேல் இருந்ததால், டிரெய்லர்களில் கொண்டு செல்வது சிரமம் என்பதால், இந்த மிஷின்கள் சீனாவிலிருந்து நான்கு பிரிவுகளாக, "சுரங்கம் தோண்டும் முன்பகுதி, (கட்டர் கெட்), பிரண்ட் சீல்டு பேரிங் மிஷின் பகுதி, மிடில் சீல்டு மோட்டார் பகுதி, சுரங்கம் தோண்டப்பட்ட பிறகு, அதன் மீது கான்கிரிட் வார்ப்புகளை பொருத்தும் மிஷின் பகுதி' என, நான்கு பிரிவுகளாக பிரிக்கப்பட்டு கப்பலில் சென்னைக்கு கொண்டு வரப்பட்டது.இந்த மிஷின்களின் நான்கு பிரிவுகளும், 64 சக்கரங்கள் பொருத்தப்பட்ட எட்டு டிரெய்லர் லாரிகளில் துறைமுகத்திலிருந்து நேற்று, இரவு 12.30 மணிக்கு புறப்பட்டு, அதிகாலை 6 மணிக்கு வண்ணாரப்பேட்டை மற்றும் ஷெனாய் நகர் நிலையங்களுக்கு வந்தடைந்தன.

இது குறித்து மெட்ரோ ரயில் அதிகாரி ஒருவர் கூறும் போது, ""சுரங்கம் தோண்டும் மிஷின், 170 டன்னுக்கு மேல் எடையுடையதாக இருந்ததால், சீனாவில் தொழிற்சாலையில் இறுதிக்கட்ட சோதனை முடிந்த பிறகு, நான்கு பிரிவுகளாக பிரிக்கப்பட்டு, கப்பலில் கொண்டுவரப்பட்டது.துறைமுகத்திலிருந்து இந்த மிஷின்களின் இணைப்பு உபகரணங்கள் சில தினங்களுக்கு முன்பு, வண்ணாரப்பேட்டை மற்றும் ஷெனாய் நகருக்கு வந்தடைந்தன. டனல் போரிங் மிஷின்கள் தற்போது இந்நிலையங்களுக்கு கொண்டுவரப்பட்டுள்ளன.
இந்த மிஷின்கள் சுரங்கம் தோண்டுவதற்கு ஒவ்வொரு நிலையத்திலும், 200 மீட்டர் நீளம், 20 மீட்டர் அகலம், 17 மீட்டர் ஆழத்திற்கு பள்ளம் தோண்டப்பட வேண்டியுள்ளது. இப்பணி முடிவதற்கு, பிப்ரவரி வரை ஆகும்.

பள்ளம் தோண்டும் பணி முடிவடைந்ததும், டனல் போரிங் மிஷின் பள்ளத்தில் இறக்கி வைக்கப்பட்டு ஒருங்கிணைக்கப்படும். இம்மிஷின்கள் ஒருங்கிணைக்கப்படும் போது இதன் நீளம், 120 மீட்டர் நீளத்திற்கு அதிகமாக இருக்கும். இம்மிஷின்களை ஒருங்கிணைக்கவும், இயக்கவும் சீனாவிலிருந்து இன்ஜினியர்கள், ஜனவரி மாதம் சென்னை வருகின்றனர்.டனல் போரிங் மிஷினில் உள்ள மண்ணை தோண்டும் "கட்டர்' பகுதி மிகவும் பலம் வாய்ந்தது. பாதையில் மலை குறுக்கிட்டாலும், எளிதாக கட் பண்ணி தூளாக்கி வெளியே அனுப்பிவிடும். இந்த மிஷின் மூலம் ஒரு நாளைக்கு, 15 மீட்டர் தூரம் சுரங்கப்பாதை அமைக்க முடியும்.இவ்வாறு, அதிகாரி கூறினார்.