சென்னை மண்ணடி பகுதியில் மெட்ரோ ரெயிலுக்கு சுரங்கம் தோண்டியபோது கட்டிடங்களில் திடீர் விரிசல்

சென்னை, மார்ச்.10-

சென்னையில் அதிகரித்து வரும் போக்குவரத்து நெரிசலை குறைப்பதற்காக, கடந்த 2 ஆண்டுகளுக்கு முன்பு மெட்ரோ ரெயில் திட்டம் தொடங்கப்பட்டது. அதன்படி, வண்ணாரப்பேட்டையில் இருந்து விமான நிலையம் வரை ஒரு வழித்தடத்திலும், சென்டிரல் முதல் பரங்கிமலை வரை ஒரு வழித்தடத்திலும் மெட்ரோ ரெயில் பாதை அமைக்கும் பணி நடைபெற்று வருகிறது.

2 வழித்தடங்களிலும் சேர்த்து மொத்தம் 45 கிலோ மீட்டர் தொலைவுக்கு மெட்ரோ ரெயில் பாதை அமைய உள்ளது. இதில், 23 கிலோ மீட்டர் தொலைவுக்கு பூமிக்கு அடியில் சுமார் 20 மீட்டர் ஆழத்தில் மெட்ரோ ரெயில் சுரங்க பாதை அமைய உள்ளது.

இதற்காக, சீனாவில் இருந்து ராட்சத வடிவிலான டனல் போரிங் எந்திரங்கள் 11 எண்ணிக்கையில் வாங்கப்பட்டுள்ளது. இந்த எந்திரங்களைக்கொண்டு, வண்ணாரப்பேட்டை, மே தினப்பூங்கா, கீழ்ப்பாக்கம் நேரு பூங்கா உள்பட ஒருசில பகுதிகளில் சுரங்க ரெயில் பாதை அமைக்கப்பட்டு வருகின்றன.

வண்ணாரப்பேட்டையில் இருந்து விமான நிலையம் வரை அமைய உள்ள மெட்ரோ ரெயில் பாதையில், சைதாப்பேட்டை வரை பூமிக்கு அடியிலேயே சுரங்கப்பாதை அமைக்கப்படுகிறது. இதுவரை, 2 வழித்தடங்களிலும் சேர்த்து 1400 மீட்டர் தூரத்திற்கு சுரங்க ரெயில் பாதை தோண்டப்பட்டுள்ளது. தொடர்ந்து விரைவாக பணிகள் நடைபெற்று வருகின்றன.

கடந்த சில மாதங்களாக பிராட்வே மண்ணடி பகுதியில் பூமிக்கு அடியில் 17 மீட்டர் ஆழத்தில் மெட்ரோ ரெயில் சுரங்கப்பாதை அமைக்கப்பட்டு வருகிறது. இதற்காக, டனல் போரிங் எந்திரம் மூலம் பூமி துளையிடப்படுகிறது. நேற்று காலை மண்ணடி மீரான் லெப்பை தெருவில் உள்ள வீடுகளில் சில திடீரென அதிர்ந்தன. இதனால், வீடுகளில் இருந்தவர்கள் பூமி அதிர்ச்சியாக இருக்குமோ? என்ற பயத்தில் வெளியே ஓடிவந்தனர். ஒருசில வீடுகளின் சுவர்களில் விரிசல் ஏற்பட்டது.

இதுகுறித்து, தகவல் அறிந்ததும் மெட்ரோ ரெயில் உயர் அதிகாரிகள் அப்பகுதிக்கு வந்து ஆய்வு செய்தனர். அப்போதுதான், அந்த பகுதியில் பூமிக்கு அடியில் மெட்ரோ ரெயில் சுரங்கப்பாதை அமைக்கும் பணி நடைபெறுவது தெரியவந்தது.

உடனடியாக, அந்த பகுதியில் உள்ள ஒரு ஓட்டலிலும், 3 குடியிருப்புகளில் இருந்த பொதுமக்களும் வெளியேற்றப்பட்டனர். மேலும், மீரான் லெப்பை தெரு வழியாக வாகனங்கள் செல்லவும் தடை விதிக்கப்பட்டது. வீதிக்கு சீல் வைக்கப்பட்டது.

தொடர்ந்து, அப்பகுதியில் பூமிக்கு அடியில் மெட்ரோ ரெயில் சுரங்கப்பாதை அமைக்கப்பட்டு வருகின்றன. அதிகாரிகள் தொடர்ந்து அப்பகுதியில் உள்ள கட்டிடங்களை கிராக் மீட்டர் கொண்டு கண்காணித்து வருகின்றனர். இதனால், அப்பகுதியில் நேற்று பெரும் பரபரப்பு ஏற்பட்டது.

இதுகுறித்து, மெட்ரோ ரெயில் உயர் அதிகாரி ஒருவர் கூறும்போது, மண்ணடி பகுதியில் மட்டும்தான் குடியிருப்புகளுக்கு அடியில் சுரங்கப்பாதை அமைக்கப்படுகிறது. இன்னும் 2 நாளில் இந்த பகுதியின் அடியில் பாதை அமைக்கும் பணி கடந்து சென்றுவிடும். அதுவரை விரிசல் ஏற்பட்ட குடியிருப்பில் உள்ளவர்கள் பாதுகாப்பான இடத்தில் தங்க வைக்கப்படுவார்கள். அதன்பிறகு, கட்டிடங்களில் ஏற்பட்ட விரிசல் சரிசெய்து கொடுக்கப்படும் என்றார்.

அச்சோ என்னய்யா பண்றிங்க நல்லது பண்றேனு