லாகூரில் இலங்கை வீரர்கள் மீது தாக்குதல் நடத்திய 3 பேரை கைது செய்ய உத்தரவு

இலங்கை கிரிக்கெட் அணி வீரர்கள் மீது 2009ம் ஆண்டு லாகூரில் தாக்குதல் நடத்தப்பட்ட சம்பவத்துடன் தொடர்புடைய மூன்று சந்தேகநபர்களுக்கு லாகூர் மேல் நீதிமன்றத்தால் ஜாமீன் இல்லாத பிடியாணை பிறப்பிக்கப்பட்டுள்ளது.

தாக்குதல் வழக்கு தொடர்பாக கடந்த காலங்களில் இடம்பெற்ற விசாரணைகளின் போது குறித்த மூன்று சந்தேகநபர்களும் ஆஜராகாது உள்ளமையால் நேற்று முன்தினம் பிடியாணை பிறப்பிக்கப்பட்டுள்ளது. சந்தேகநபர்களான குவாரி முஹமட் முஸ்தாக், அமனுல்லா மற்றும் உபைதுர் ரஹெமான் ஆகியோரை கைது செய்து நீதிமன்றத்தில் ஆஜர்படுத்துமாறு லாகூர் மேல் நீதிமன்ற நீதிபதிகளான செயிக் அஹமட் பாரூக், காசிம் ரசா சம்சி ஆகியோர் லாகூர் நகர் பொலிஸாருக்கு உத்தரவிட்டுள்ளனர்.

இலங்கை கிரிக்கெட் வீரர்கள் மீது தாக்குதல் நடத்தப்பட்ட சந்தேகத்தில் கைது செய்யப்பட்ட 6 சந்தேகநபர்களுக்கு பிணை வழங்கப்பட்டமைக்கு எதிர்ப்புத் தெரிவித்து பஞ்சாப் மாநில அரசு தாக்கல் செய்திருந்த மனு விசாரணைக்கு எடுத்துக் கொள்ளப்பட்ட போதே இந்த பிடியாணை பிறப்பிக்கப்பட்டுள்ளது.

இலங்கை கிரிக்கெட் அணி வீரர்கள் மீது தாக்குதல் நடத்தியது தொடர்பான வழக்கு கடந்த முறை விசாரணைக்கு எடுத்துக் கொள்ளப்பட்ட போது மொஹ்சின் ரiத், ஜாவேத் அன்வர் மற்றும் அப்துல்லா ஆகிய மூன்று சந்தேகநபர்கள் நீதிமன்றில் ஆஜரான போதும் ஏனைய மூவரும் ஆஜராகவில்லை என பாகிஸ்தான் தகவல்கள் தெரிவிக்கின்றன.