எழுபதாவது நாளாக 3ம் கட்ட போராட்டம்

by *சம்ஸ் Wed 28 Dec 2011 - 6:36

கூடங்குளம் பக்தி கிராமங்களை சேர்ந்த இளைஞர்கள் இளம் பெண்கள் நேற்று முன்தினம் பேரணியாக அணுமின் நிலையத்தை நோக்கிச் சென்றார்கள்.

நெல்லை மாவட்டம் ராதாபுரம் தாலுகா கூடங்குளத்தில் அமைக்கப்பட்டு உள்ள அணுமின் நிலையத்தை மூட வலியுறுத்தி, தொடர் போராட்டங்கள் நடந்து வருகின்றன. தற்போது 3வது கட்ட தொடர் உண்ணாவிரதம் நடைபெற்று வருகிறது.

நாள்தோறும் வெவ்வேறு கிராமங்களை சேர்ந்தவர்கள் கூடங்குளம் அருகே இடிந்தகரை கிராமத்தில் உள்ள தேவாலய வளாகத்தில் உண்ணாவிரதம் இருந்து வருகிறார்கள். நேற்று முன்தினம் 70 வது நாளாக 3 வது கட்ட போராட்டம் நடந்தது.

கூடங்குளம் அணு உலைக்கு எதிராக தொடர் போராட்டங்கள் நடத்திய பின்னரும் மத்திய அரசு பாராமுகம் காட்டி வருவதாகவும், எனவே தமிழகத்துக்கு வருகை தந்த பிரதமர் மன்மோகன் சிங்குக்கு எதிர்ப்பு தெரிவிப்பதாகவும் கூறி நேற்று முன்தினம் கூடங்குளத்தில் பேரணி நடந்தது.

கூடங்குளம், வைராவி கிணறு விஜயாபதி இடிந்தகரை கூட்டப்புளி, உவரி, கூத்தங்குளி, பெருமணல், ஆவுடையாள்புரம் உள்பட பல்வேறு கடற்கரையோர கிராமங்களை சேர்ந்த பெண்கள், மாணவிகள், இளைஞர்கள் பேரணியில் கலந்துகொண்டனர்.

பலர் கறுப்புக் கொடிகளை ஏந்தி வந்தனர், ‘அணு உலை வேண்டாம்’ என்ற வாசகங்கள் அடங்கிய பதாகைகளை சிலர் வைத்து இருந்தனர். அணு உலையை மூட வலியுறுத்தியும், மத்திய அரசுக்கு கண்டனம் தெரிவித்தும், அணு உலை மூலம் வருங்கால சந்ததியினரை அழித்து விடாதீர்கள் என்றும் கோஷமிட்டனர். இப்பேரணியில் ஆயிரக்கணக்கானவர்கள் கலந்து கொண்டனர்.

பின்னர் பேரணியில் பங்கேற்றவர்களில் பலர் இடிந்தகரை கிராமத்துக்கு சென்றனர். கடந்த 2004ம் ஆண்டு டிசம்பர் மாதம் சுனாமி பேரலையால் உயிர் இழந்தவர்களுக்கு அஞ்சலி செலுத்தும் நிகழ்ச்சியில் கலந்துகொண்டனர்.