15 ஆயிரம் மெமரி கார்டுகள் மற்றும் 268 தங்கச் சங்கிலிகள் கடத்தி வந்தவர் கைது

by **நேசமுடன் ஹாசிம்** Thu 29 Dec 2011 - 11:58

சிங்கப்பூரிலிருந்து வந்த விமானத்தில், ஒரு கிலோ தங்கம், 15 ஆயிரம் மெமரி கார்டு என, 50 லட்சம் ரூபாய் மதிப்புள்ள பொருட்களை கடத்தி வந்த பயணியை, திருச்சி விமான நிலையத்தில் கஸ்டம்ஸ் அதிகாரிகள் கைது செய்தனர்.

திருச்சி விமான நிலையத்துக்கு,நேற்று முன்தினம் நள்ளிரவு, 12 மணிக்கு சிங்கப்பூரிலிருந்து, டைகர் ஏர்வேஸ் விமானம் வந்தது. அதில் வந்த பயணிகளை கஸ்டம்ஸ் அதிகாரிகள் சோதனையிட்டனர். அப்போது, சந்தேகத்துக்கிடமான முறையில் வந்த சென்னை எல்லீஸ் நகரைச் சேர்ந்த சர்புதீன்,47, என்ற வாலிபரை கஸ்டம்ஸ் அதிகாரிகள் மடக்கி, சோதனையிட்டனர். அவரது பேன்ட் பெல்ட் மற்றும் பேன்டில் மறைத்து, 15 ஆயிரம் மெமரி கார்டுகள் மற்றும் 268 தங்கச் சங்கிலிகள் கொண்ட ஒரு கிலோ தங்கம் ஆகியவற்றை, கடத்தி வந்தது கண்டுபிடிக்கப்பட்டது. அவற்றை, கஸ்டம்ஸ் அதிகாரிகள் பறிமுதல் செய்தனர். பறிமுதல் செய்யப்பட்ட தங்கம் மற்றும் மெமரி கார்டுகளின் மதிப்பு, 50 லட்சம் ரூபாய் இருக்கும் என்று கூறப்படுகிறது. கஸ்டம்ஸ் அதிகாரிகள், சர்புதீனிடம் விசாரணை மேற்கொண்ட பின், அவரை கைது செய்தனர். திருச்சி ஜே.எம்., 1 கோர்ட்டில் மாஜிஸ்திரேட் இளங்கோவன் முன் அவரை ஆஜர்படுத்தினர். மாஜிஸ்திரேட் உத்தரவை அடுத்து, அவர், திருச்சி மத்திய சிறையில் அடைக்கப்பட்டார்.

சர்புதீன் பின்னணி: சர்புதீன் அடிக்கடி வெளிநாடு சென்றுவிட்டு, வரும்போது நிறைய பொருட்களை கடத்தி வருவதை தொழிலாக கொண்டுள்ளார். இதற்கு சில கஸ்டம்ஸ் அதிகாரிகள் துணையாக இருந்துள்ளனர். அப்படியிருந்தும் நேற்று சர்புதீன் கைது செய்யப்பட்டுள்ளார். அவர் பிடிபட்டதாக கணக்கு காண்பிக்கப்பட்டதை விட, அதிகளவில் தங்கம் கொண்டு வந்ததாகவும், அதை சிலர் மறைத்துள்ளதாகவும் தகவல் வெளியாகியுள்ளது பெரும் பரபரப்பை ஏற்படுத்தியுள்ளது.