ஆக்கிரமிப்பு கிழக்கு ஜெரூசலத்தில் மேலும் 130 வீடுகளை அமைக்கிறது இஸ்ரேல் அரசு

by *சம்ஸ் Fri 30 Dec 2011 - 9:54

ஆக்கிரமிப்பு கிழக்கு ஜெரூசலத்தில் மேலும் 130 வீடுகளை அமைக்கிறது இஸ்ரேல் அரசு
கிழக்கு ஜெரூசலம் நகரில் சட்ட விரோதமாக மேலும் 130 வீடுகளை அமைக்க இஸ்ரேல் மாநகர சபை அனுமதி அளித்துள்ளது. ஜோர்தானிடம் இருந்து 1967 ஆம் ஆண்டு யுத்தத்தின்போது ஆக்கிரமித்த பகுதியிலேயே இஸ்ரவேல் புது வீடுகளை கட்டவுள்ளது.

மேற்கு ஜெரூசலம் மற்றும் ஆக்கிரமிக்கப்பட்ட கிழக்கு ஜெரூசலம் பகுதிகள் ஒருங்கிணைந்த நகராக அமைக்க இஸ்ரேல் அரசு முயற்சித்து வருகிறது. இதற்கான குடியிருப்புகளை அமைப்பதற்கு மாநகரசபை மட்டத்திலேயே செயற்திட்ட ங்கள் முன்னெடுக்கப்பட்டு வருகிறது.

இதற்கு அரசு எந்த தலையீடு செய்வதில்லை. எனினும், கிழக்கு ஜெரூசலம் பலஸ்தீனிடம் இருந்து ஆக்கிரமித்த பகுதி என இஸ்ரேல் அரசு மீது சர்வதேச நாடுகள் குற்றம் சாட்டி வருகின்றன. கிழக்கு ஜெரூசலம் பலஸ்தீனின் தலைநகர் என பலஸ்தீன நிர்வாகம் தொடர்ந்து குறிப்பிட்டு வருகிறது.

இந்நிலையில் இஸ்ரேல் தனது சட்ட விரோத குடியிருப்புகளை அகற்றும்வரை அதனுடன் சமாதான பேச்சுவார்த்தை முன்னெடுக்கப்படமாட்டாது என பலஸ்தீன நிர்வாகம் ஏற்கனவே அறிவித்துள்ளது. இஸ்ரேல் அரசின் உத்தியோபூர்வ அறிவிப்பின்படி ஆக்கிரமிக்கப்பட்ட கிழக்கு ஜெருசலத்தில் 2,057 குடியிருப்புகள் அமைக்கப் படவுள்ளதோடு, மேற்குக் கரையில் 1,241 குடியிருப்புகளுக்கான கட்டுமானப் பணிகள் ஆரம்பிக்கப்பட் டுள்ளன. மொத்தமாக 310,000 இஸ்ரேலியர்கள் சட்ட விரோத ஆக்கிரமிப்பு பகுதிகளில் வாழ்ந்து வருகின்றனர்.