தளவாய் சுந்தரம் நீக்கம்; இன்று பொதுக்குழு கூட்டம்

அ. தி. மு. க. அமைப்புச் செயலர் பதவியில் இருந்து முன்னாள் அமைச்சர் தளவாய் சுந்தரம் நீக்கப்பட்டுள்ளார். போயஸ் தோட்ட அதிகார மையங்கள் விலக்கப்பட்ட பிறகு, கட்சி நிர்வாகிகளில் ஏற்பட்டுள்ள முக்கிய மாற்றம் என்பதால், நிர்வாகிகள் மத்தியில் பரபரப்பு ஏற்பட்டுள்ளது.

அ. தி. மு. க. வில் உள்ள மூத்த நிர்வாகிகள், கட்சியின் அமைப்புச் செயலர்களாக நியமிக்கப்படுகின்றனர். சுலோசனா சம்பத், விசாலாட்சி நெடுஞ்செழியன், விஜயலட்சுமி பழனிசாமி, சோழன் பழனிசாமி, தம்பிதுரை, செம்மலை, தளவாய் சுந்தரம் உள்ளிட்ட 14 பேர் அமைப்புச் செயலராக நியமிக்கப்பட்டிருந்தனர்.

இதில் தளவாய் சுந்தரத்தை கட்சியின் அமைப்புச் செயலர் பதவியில் இருந்து நீக்குவதாக அ. தி. மு. க. பொதுச் செயலர் ஜெயலலிதா அறிவித்துள்ளார். கன்னியாகுமரி மாவட்டத்தைச் சேர்ந்த தளவாய் சுந்தரம் லோக்சபா எம். பி. யாகவும், கடந்த 2001 – 06 ஆம் ஆண்டு அ. தி. மு. க. ஆட்சியில் சுகாதாரத்துறை அமைச்சராகவும் பதவி வகித்தார்.

கடந்த தேர்தலில் இவருக்கு போட்டியிட வாய்ப்பு தரப்படவில்லை. இருப்பினும், கட்சியின் அமைப்புச் செயலர் என்ற முறையில், கட்சி நிகழ்ச்சிகளில் இவர் பங்கேற்று வந்தார்.

சசிகலா குடும்பத்தினர் போயஸ் தோட்டத்தில் இருந்து வெளியேற்றப்பட்ட பின், கட்சியில் பெரிய அளவில் நடந்த மாற்றம் என்பதால் நிர்வாகிகளிடம் பரபரப்பு எழுந்துள்ளது.

கட்சியில் இருந்து நீக்கப்பட்டவர்களுடன் தொடர்பு வைத்திருந்ததாக கட்சித் தலைமைக்கு ஏற்பட்ட சந்தேகத்தின் காரணமாகவே இவர் பதவியில் இருந்து நீக்கப்பட்டதாக கட்சி வட்டாரங்கள் தெரிவிக்கின்றன. கட்சியின் பொதுக்குழு இன்று கூடவுள்ள நிலையில் இந்த பதவிப் பறிப்பு நடந்துள்ளது. பொதுக் குழுக் கூட்டத்திற்கு பிறகு கட்சி நிர்வாகிகள் பட்டியலில் பெரிய அளவில் மாற்றம் செய்ய ஜெ. திட்டமிட்டுள்ளதாகக் கூறப்படுகிறது.