பரபரப்பான சூழலில்...இன்று திமுக உயர்நிலை செயல் திட்டக் குழுக் கூட்டம்!

by **யாதுமானவள்** Thu 2 Feb 2012 - 13:57

சென்னை: தமிழக அரசியலில் புதிய பரபரப்புச் சூழல் ஏற்பட்டுள்ள பின்னணியில் திமுகவின் உயர்நிலை செயல் திட்டக் குழுக் கூட்டம், மாவட்டச் செயலாளர்கள் கூட்டம் இன்று அண்ணா அறிவாலயம், முரசொலி மாறன் அரங்கில் மாலையில் நடைபெறுகிறது.

கட்சித் தலைவர் கருணாநிதி தலைமை தாங்குகிறார். இக்கூட்டத்தில், தி.மு.க. அமைப்புகளுக்கான 14-வது பொதுத்தேர்தல், அமைப்பு முறை தொடர்பான சட்ட திட்டத் திருத்தங்கள் மற்றும் தி.மு.க. உறுப்பினர் சேர்ப்பு, புதுப்பித்தல் குறித்து ஆலோசனை நடத்தப்படும் என்று அறிவிக்கப்பட்டுள்ளது.

இருந்தாலும் தற்போது அதிமுக, தேமுதிக இடையே மூண்டுள்ள புதிய யுத்தம் தொடர்பாக எழுந்துள்ள புதிய அரசியல் சூழல் குறித்தும் இக்கூட்டத்தில் முக்கியமாக விவாதிக்கப்படும் என்று தெரிகிறது. லோக்சபா தேர்தலை மனதில் கொண்டு கட்சியினருக்கு முக்கிய அறிவுரைகள் வழங்கப்படலாம் என்றும் தெரிகிறது.

நேற்று விஜயகாந்த் செய்தியாளர்களிடம் பேசும்போது, திமுக ஆட்சியை மைனாரிட்டி ஆட்சி என்று சொல்வது தவறு என்று சுட்டிக் காட்டியது நினைவிருக்கலாம். எனவே இது திமுகவினர் மத்தியில் ஒரு சின்ன பிளாஷ் லைட் அடித்துள்ளது. எனவே விஜயகாந்த் விவகாரத்தி்ல நீக்குப் போக்காக நடக்க திமுக முயற்சிக்கலாம் என்றும் எதிர்பார்க்கப்படுகிறது.

இந்தக் கூட்டத்தைத் தொடர்ந்து நாளை காலை 10 மணிக்கு திமுக பொதுக்குழு கூடுகிறது. இக்கூட்டத்தில் நாடாளுமன்ற தேர்தல், தணிக்கைக் குழு அறிக்கை குறித்து ஆலோசனை நடத்தப்படுகிறது.

கனிமொழிக்கு உயர் பதவி கொடுப்பது குறித்தும் உயர் நிலை கூட்டத்தில் முடிவு எடுக்கப்படும் என்று தெரிகிறது.