கொழும்பில் கொலை, கொள்ளை, கடத்தல்கள் நடந்தால் அரசு பார்த்துக் கொண்டிருக்குமா?

by **நண்பன்** Fri 21 Jan 2011 - 10:12

யாழ்.குடாநாட்டில் தொடர்ந்து இடம்பெறும் கொலை, கொள்ளை, ஆள்கடத்தல் சம்பவங்கள் கொழும்பிலும், கண்டியிலும் இடம்பெற்றால் அரசு பார்த்துக்கொண்டிருக்குமா? என்று எதிர்க்கட்சித் தலைவர் ரணில் விக்கிரமசிங்க நேற்று நாடாளுமன்றத்தில் கேள்வி எழுப்பினார்.
நாடாளுமன்றம் நேற்று சபாநாயகர் சமல் ராஜபக்ஷ தலைமையில் கூடியது. யாழ்.குடாநாட்டில் இடம்பெறும் கொலை, கொள்ளை, கடத்தல் சம்பவங்கள் தொடர்பாக நாடாளுமன்றில் நேற்று நடைபெற்ற ஒத்திவைப்புவேளை பிரேரணையை வழிமொழிந்து உரையாற்றிய போதே அவர் மேற்கண்ட கேள்வியை எழுப்பினார்.

அவர் அங்கு மேலும் கூறியவை வருமாறு:

வடக்கில் இதுவரை மீள்குடியேற்றம் பூரணப்படவில்லை. இடம்பெயர்ந்த பலர் கோவில்களிலும், கூடாரங்களிலும், உறவினர் வீடுகளிலும் தங்கியுள்ளனர். கிளிநொச்சியில் பல்வேறு பிரச்சினைகள் காரணமாக நாளொன்றுக்கு ஒருவர் வீதம் தற்கொலை செய்து கொள்கின்றனர். குடாநாட்டில் சட்டம் ஒழுங்குகள் தொடர்பில் தற்போது சந்தேகம் நிலவுகின்றது.அங்கு தற்போது திடுக்கிடும் சம்பவங்கள் இடம்பெறுகின்றன.

கடந்த டிசம்பர் 27ஆம் திகதி தொடக்கம் ஜனவரி 8ஆம் திகதிவரையானகாலப்பகுதிக்குள் 10கொலைகள் இடம்பெற்றுள்ளன. அச்சுவேலியில் சிவகுமார் என்பவர் டிசம்பர் 30 ஆம் திகதி கொலை செய்யப்பட்டுள்ளார். டிசம்பர் 31ஆம் திகதி வடமராட்சியில் புஷ்பாதேவி என்ற குடும்பப்பெண் கொல்லப்பட்டார். அதேதினம் காரைநகரில் சிவநேசராஜா என்பவரின் சடலம் மீட்கப்பட்டது.

ஜனவரி முதலாம் திகதி உரும்பிராயில் கோபிநாதன் என்ற ஆட்டோச்சாரதி கொல்லப்பட்டார். யோகபுரம் பகுதியில் ஜனவரி 3ஆம் திகதி மகாலிங்கம் என்பவர் கொல்லப்பட்டார். வலிகாமம் பிரதேசத்தில் பிரதிக்கல்விப் பணிப்பாளர் சுட்டுக் கொல்லப்பட்டார்.

யாழ்ப்பாணத்தில் தொடர்ந்து இடம்பெற்ற இச்சம்பவங்களுடன் தொடர்புடையவர்கள் இதுவரை கைதுசெய்யப்பட வில்லை. ஏன் அவர்கள் இதுவரை கைதுசெய்யப்படவில்லை? யாழ். மாவட்டத்தில் சுமார் 60ஆயிரத்துக்கும் மேற்பட்ட படையினர் பாதுகாப்புக் கடமையில் ஈடுபட்டுள்ள நிலையில் இவ்வாறான சம்பவங்கள் இடம்பெற்றுள்ளன.

பல திசைகளில் குற்றச்சாட்டுகள் சுட்டிக்காட்டப்படுகின்றன. இதற்குக் காரணம் முன்னாள் போராளிகள் எனவும், முன்னாள் இராணுவ வீரர்கள் எனவும், அரசியல் கட்சிகள் என்றும் கூறப்படுகிறது. இந்தக் குழப்ப நிலையைத் தடுக்க அரசு சர்வகட்சி தூதுக்குழு ஒன்றை நியமித்து தீர்வுகாண வேண்டும். ஆனால் எமது அந்த யோசனைக்கு அரசு எதிர்ப்பை வெளியிடுகிறது.

சர்வதேச மட்டத்தில் இலங்கைக்கு எதிரான பல்வேறு குற்றச்சாட்டுகள் உள்ளன. அதுபோன்றே யாழ்.சம்பவங்களும் அரசுக்கு எதிராகவே அமைந்துவிடும். சர்வதேச ரீதியில் நாம் ஒதுக்கப்படும் நிலை ஏற்படும்.என்றார்