இதுவரை பார்த்திராத பாதிப்பு

இதுவரை பார்த்திராத பாதிப்பு
கருணாநிதி வேதனை
விழுப்புரம், கடலூர் மாவட்டங்கள் மற்றும் புதுச்சேரியில், புயலால் பாதித்த பகுதிகளை தி. மு. க. தலைவர் கருணாநிதி நேற்று முன்தினம் பார்வையிட்டார். சென்னையிலிருந்து நேற்று காலை வந்த முன்னாள் முதல்வர் கருணாநிதி விழுப்புரம் மாவட்டம் மரக்காணத்தில் புயல் பாதித்த பகுதிகளை பார்வையிட்டார்.

மரக்காணம் பூமிஸ்வரன் கோயில் பகுதியிலிருந்து கோட்டக்குப்பம் வரை உள்ள 19 மீனவ கிராமங்களையும், கிழக்கு கடற்கரை சாலையில் சென்றவாறு பார்வையிட்டார். மரக்காணம் அடுத்த அகரம் பகுதியில் வனத் துறையின் தைல மரங்கள் அடியோடு சாய்ந்திருப்பதை பார்வையிட்டார். அனிச்சங்குப்பம் மீனவ கிராம மக்களுக்கு வேட்டி, சேலைகளை வழங்கினார். கூனிமேடு கிராம மக்கள், கருணாநிதியை சந்தித்து மனு கொடுத்தனர்.

மரக்காணத்தில் அவர் நிருபர்களிடம் கூறுகையில்,

புயல் பாதிப்பில் மரக்காணம் பகுதியில் சேதாரங்கள் அதிகமாக உள்ளது. நான் இதுவரை பார்த்திராத அளவிற்கு பாதிப்பு உள்ளது’ என்றார். பின் கடலூர் செல்லும் வழியில் புதுச்சேரியை சேர்ந்த காலாப்பட்டு, பாகூரில் புயல் பாதிப்பு பகுதிகளை காரில் இருந்தவாறே பார்வையிட்டார்.

பகல் 11.30 மணிக்கு கடலூர் மாவட்டத்திற்கு வந்தார். பெரியகாட்டுப்பாளையம், ரெட்டிச்சாவடி, பெரிய கங்கணாங்குப்பம் பகுதிகளில் ஏற்பட்ட புயல் பாதிப்புகளை பார்வையிட்ட பின் மதியம் கடலூரில் உள்ள தனியார் பள்ளியில் ஓய்வெடுத்தார்.

புயலால் பாதிக்கப்பட்ட மக்களுக்கு தி. மு. க. அறக்கட்டளை சார்பில் 50 இலட்ச ரூபாய் நிவாரண உதவியாக வழங்கப்படும் என தி. மு. க. தலைவர் கருணாநிதி கூறினார். இது குறித்து அவர் நேற்று முன்தினம் நிருபர்களிடம் கூறியதாவது :-

சென்னையிலிருந்து புறப்பட்டு வழியில் மரக்காணம் பகுதியில், புயல் பாதித்த இடங்களைப் பார்வையிட்டேன். இதையடுத்து, புதுச்சேரியிலும், கடலூரிலும் புயலால் பாதிக்கப்பட்ட பகுதிகளைப் பார்வையிட்டேன்.

புயலால், 10 ஆயிரம் ஹெக்டேயர் நெல், 2,000 ஹெக்டேயர் கரும்பு, 1500 ஹெக்டேயர் வாழை, தென்னை மற்றும் வெற்றிலை பயிர்கள் சேதமடைந்துள்ளதாகத் தகவல்கள் வருகின்றன. மேலும், 150 மின் மாற்றிகளும், புயலால் சேதம் அடைந்துள்ளதாகக் கூறுகின்றனர். கடலூர், புதுச்சேரியில் ஆயிரக் கணக்கான மக்கள் புயலால் பாதிக்கப்பட்டுள்ளனர்.

மத்திய, மாநில அரசுகள் செய்யும் நிவாரண உதவிகள், உரிய நேரத்தில் மக்களைச் சென்று சேர்ந்தால் பயனுள்ளதாக இருக்கும். புயலால் பாதிக்கப்பட்ட மக்களுக்கு தி. மு. க. அறக்கட்டளை சார்பில் 50 இலட்ச ரூபாய் நிவாரண உதவியாக வழங்கப்படும். இந்த நிதியை, புயலால் பாதிக்கப்பட்ட பகுதியில் உள்ள கட்சி நிர்வாகிகள் உரிய முறையில் உரியவர்களுக்கு வழங்க வேண்டும். இவ்வாறு கருணாநிதி கூறினார்.

தகவலுக்கு நன்றி.