நாவல் மரம் கற்பித்த பாடம்

by *சம்ஸ் Sat 7 Jan 2012 - 6:34

நாவல் மரம் கற்பித்த பாடம்
ராமன் பள்ளிக்குச் செல்லாமல் வீட்டு வாசலில் உட்கார்ந்திருந்தான். அவள் தாய் வாசுமதி பாலனிடம் வந்து, “என்னடா, மணி ஏழு ஆகிவிட்டது, இன்னும் ஸ்கூலுக்குப் போகவில்லையா?” என்று கேட்டாள்.

“இல்லையம்மா?” எனக்கு சரியாகத் தலைவலிக்கிறது” என்றான் பாலன்

“தலைவலிக்குதா, சரி, வா டொக்டர்ட்ட போகலாம்” என்று அவன் தலையைக் கோதியபடி பரிவுடன் கூறினாள் வாசுமதி.

“வேணாம்மா... அது தானாக சரியாயிடும்” என்றான், பாலன்

அவன் மனதில் பெரும் கவலை குடியிருந்தது. காரணம் இதுதான். அவன் பள்ளி செல்லும் வழியில் ஒரு நாவல் மரம் உள்ளது. ரொம்ப நாளாக இந்த மரத்தில் உள்ள பழத்தை ருசி பார்த்து விட வேண்டும் என்று அவனுக்கு ஆசை. அதனால் பள்ளி செல்லும்போதெல்லாம் மரத்தைப் பார்த்துக் கொண்டே செல்வான்.

அவனது ஆசை நிறைவேறும் நாள் வந்தது. அதனால் அன்று பள்ளிக்குச் செல்லாமல் யாருக்கும் தெரியாமல் நாவல் பழங்களை ருசி பார்த்து விட வேண்டும் என்று நினைத்தான். அதனால் பள்ளிக்குச் செல்வதற்காகக் கொண்டு வந்த பையை மரத்தின் ஒரு ஓரமாக வைத்து விட்டு, பழங்களை பறிக்க மரத்தில் விறுவிறுவென ஏறினான்.

அப்போது அந்த வழியாக வந்த தமிழ் ஆசிரியர் ஜீவா அவனைப் பார்த்து விட்டார். “ஐயையோ, வசமாக மாட்டிக் கொண்டோமே” என்று பயந்தபடி மரத்தில் பதுங்கியிருந்தான், உடனே, அவனைக் கீழே இறங்கச் சொன்ன ஆசிரியர், “நாளைக்கு வரும்போது உன் அப்பாவை அழைத்துக் கொண்டு வா” என்று சொல்லி விட்டு கிளம்பினார்.

பாலனுக்கு இதைக் கேட்டதும், உச்சந்தலை முதல் உள்ளங்கால் வரை வியர்த்தது. “அப்பாவை எப்படி அழைத்துச் செல்வது” அவருக்குத் தெரிந்தால் சாட்டை அடி அல்லவா, விழும்?” என்று பயந்து கொண்டே இருந்தான். இன்று வெள்ளிக்கிழமை பாடசாலை போகாவிட்டால், அடுத்த இருநாட்களும் விடுமுறைதான். அதனால், அப்பாவிடம் எப்படியாவது சொல்லி, திங்கட்கிழமை பள்ளிக்கு அழைத்துச் செல்ல வேண்டியதுதான் என்று முடிவு செய்தான்.

அடுத்த இருநாட்கள் அப்பாவின் முகத்தைக் கூட பார்க்க முடியாமல் பயந்தான். அப்பாவிடம் விஷயத்தை எப்படி சொல்வது என்று பயந்து கொண்டு, சாப்பிடாமல் தூக்கம் வராமல் அவதிப்பட்டான்.

திங்கட்கிழமை பொழுது விடிந்தது. அப்பாவிடம் அதுவரையிலும் சொல்லவில்லை. வேறு வழியின்றி பள்ளிக்கு கிளம்பினான். பயனத்துடன் தமிழ் அரசியரை சென்று சந்தித்தான். அவர், இந்த இருநாட்களிலும் ராமனிடம் ஏற்பட்ட வித்தியாசத்தைக் கண்டு கொண்டார். பாலன் அவரிடம் சென்று தன் தவறை உணர்ந்து அழுது மன்னிப்பு கேட்டான். ஆசிரியர் அவன் முதுகில் தட்டிக் கொடுத்தார்.

“தம்பி, நான் நினைத்திருந்தால், உன்னைப்பற்றி உன் பெற்றோரிடம் சொல்லியிருக்க முடியும். பெற்றோர் உன்னை அடித்திருப்பார்கள். அதனால், உனக்கு என் மீதும், உன் பெற்றோர் மீதும் கோபம் ஏற்படும். அதனால் எந்த பலனும் இல்லை. உன் தவறை உணர வேண்டும் என்பதால் தான் இவ்வாறு செய்தேன். இந்த இரண்டு நாட்களிலும் ஏற்பட்ட அனுபவத்தை வாழ்நாள் முழுவதும் மறக்கக்கூடாது. இந்த அனுபவம் உனக்கு நல்ல பாடத்தைத் தந்திருக்கும். இனியாவது ஒழுங்காகப் பள்ளிக்கு வந்து படி” என்று அறிவுரை கூறினார்.

அதன் பின்னர் பாலன் தெளிந்த முகத்துடனும், மனதுடனும் வகுப்பறைக்குச் சென்றான்.