நயன்தாராவுக்கு கேடயம்

by **நண்பன்** Sat 7 Jan 2012 - 10:45

நயன்தாரா கடைசியாக நடித்த தெலுங்கு படம் ஸ்ரீராம ராஜ்ஜியம். இப்படத்துக்கு பின் சினிமாவுக்கு முழுக்குப் போட்டார். ராமாயண கதையை இதில் படமாக்கி இருந்தனர். இப்படத்தில் நயன்தாரா சீதை வேடத்திலும் தெலுங்கு நடிகர் பாலகிருஷ்ணா, ராமன் வேடத்திலும் நடித்து இருந்தனர். படப்பிடிப்பு கடைசி நாளில் நயன்தாரா கண்ணீர் மல்க விடை பெற்றார்.

படப்பிடிப்பு குழுவினர் பூ மலர்களை அள்ளி வீசி வழி அனுப்பி வைத்தனர். அதன் பிறகு நிறைய பட வாய்ப்புகள் வந்தும் நயன்தாரா நடிக்கவில்லை. பிரபுதேவாவை திருமணம் செய்து கொள்ள தயாராகி வருகிறார். இதற்கிடையில் ஸ்ரீராம ராஜ்ஜியம் படம் ஆந்திராவில் வெற்றிகரமாக ஓடி
50 நாட்களை தாண்டி உள்ளது.

இதன் வெற்றி விழா ஐதராபாத்தில் நடந்தது. நயன்தாரா பல மாதங்களாக பொதுநிகழ்ச்சிகளில் பங்கேற்காமல் ஒதுங்கி இருந்தார். ஸ்ரீராமராஜ்ஜியம் வெற்றி விழாவில் மட்டும் திடீரென அவர் பங்கேற்று பார்வையாளர்களை அதிர வைத்தார். பட்டுப்புடவை ஜாக்கெட்டில் அவர் வந்து இருந்தார். நயன்தாராவுக்கு பிரபல தயாரிப்பாளர் தாசரி நாராயணராவ் கேடயம் வழங்கினார்.

அப்போது கூட்டத்தினர் கைதட்டி ஆரவாரம் செய்தனர். பால கிருஷ்ணா மற்றும் படத்தில் நடித்த இதர நடிகர், நடிகைகள், தொழில்நுட்ப கலைஞர்களுக்கும் கேடயங்கள் வழங்கப்பட்டன. விழா முடிந்ததும் காரில் ஏற வந்த நயன்தாராவை ரசிகர்கள் சூழ்ந்தனர். ஆட்டோகிராப் வாங்க முண்டியடித்தனர். சிரித்தப்படி கை அசைத்தவாறே காரில் ஏறி புறப்பட்டு சென்றார்.