மின் ஆளுமைக்கான முதல்வர் விருது

by *சம்ஸ் Tue 17 Jan 2012 - 6:34

மின் ஆளுமைக்கான முதல்வர் விருது
ஜெயலலிதா அறிவிப்பு
மின் ஆளுமைக்கான முதல்வர் விருது என்ற திட்டத்தை முதல்வர் ஜெயலலிதா அறிவித்தார். இது தொடர்பாக தமிழக அரசு வெளியிட்ட அறிவிப்பு:

அரசு நடைமுறைகளில் புதுமையைப் புகுத்தி, அரசை தேடி மக்கள் என்ற நிலையை மாற்றி மக்களை நாடி அரசு என்ற நிலையை தகவல் தொழில்நுட்பத் துறை மூலம் ஏற்படுத்தும் வகையில் அரசு பல்வேறு நடவடிக்கைகளை எடுத்து வருகிறது.

இதன் மூலம் அரசின் பல்வேறு சேவைகளும் கணனி மயமாக்கப்பட்டு பொதுமக்கள் அரசு சேவைகளை எளிதில் பெற வழிவகை செய்யப் பட்டு ள்ளது.

மின் ஆளுமை யினை பயன்படுத்தி அரசின் சேவைகளை மக்களின் இருப்பிடத்திற்கே கொண்டு செல்லும் அரசுத் துறைகளை ஊக்குவிக்கும் வகையிலும் உரிய அங்கீகாரம் அளிக்கும் வகையிலும் மின் ஆளுமைக்கான முதலமைச்சரின் உயரிய விருது என்ற விருதினை ஆண்டு தோறும் வழங்க முதல்வர் ஆணையிட்டுள்ளார்.

மாநிலத்தில் மின் ஆளுமை தொடர்பான சிறந்த செயல்பாடுகளை அங்கீகரித்தல் மின் ஆளுமை குறித்த சிறந்த செயல்முறைகளை வடிவமைத்து செயல்படுத்துதல் தொடர்பான அறிவினை பரப்புதல், அரசின் செயல்பாடுகளை மின் ஆளுமை முறைக்கு மாற்றுவதை ஊக்குவித்தல் மின் ஆளுமை முறையை நடைமுறைப்படுத்துவதில் ஏற்படும் பிரச்சினைகளைக் கண்டறிந்து அவற்றினை தீர்த்தல் இடர்பாடுகளைத் தவிர்த்தல், வெற்றிக்கு வித்திடல் ஆகியவற்றை ஊக்குவித்து அந்த அனுபவங்களை பகிர்ந்து கொள்ளுதல் போன்றவை இந்த விருதின் நோக்கமாகும்.

அரசின் செயல்பாடுகளை பகுப்பாய்வு செய்து பணிமுறைகளை மறுவடிவமைத்து செயல்பாடுகளை மேம்படுத்துதலில் சிறந்த செயல்முறை தரமான சேவை அல்லது இவை அனைத்தையும் உள்ளடக்கிய சிறந்த திட்டங்களை அங்கீகரிக்கும் விதமாக அரசின் செயல்பாடுகளை மறு வடிவமைத்தலில் சிறந்து விளங்குதல் என்ற பிரிவின் கீழ் ஒரு விருதும், தற்போதுள்ள தகவல் தொலைத் தொடர்பு தொழில்நுட்பத்தை பயன்படுத்தி அல்லது புதுமையான முயற்சிகள் மேற்கொண்டு பயனாளிகளுக்கு மேம்படுத்திய சேவைகளை வழங்கும் திட்டங்களை அங்கீகரிக்கும் விதமாக புதிய தொழில்நுட்பங்களை பயன்படுத்தி குடிமக்களை மையமாகக் கொண்டு வழங்கப்படும் சேவைகளில் சிறந்து விளங்குதல் என்ற பிரிவின் கீழ் ஒரு விருதும் பிற மாவட்டங்களில் பயன்படுத்தக்கதாக உள்ள மாவட்ட அளவிலான சிறந்த மின் ஆளுமை முயற்சிகளை அங்கீகரிக்கும் விதமாக மாவட்ட அளவிலான மின் ஆளுமை முயற்சிகள் என்ற பிரிவின் கீழ் ஒரு விருதும், மொத்தம் மூன்று பிரிவுகளின் கீழ் மின் ஆளுமைக்கான முதலமைச்சரின் உயரிய விருது வழங்கப்படும். இந்த விருதின் கீழ் ரூ. 30 ஆயிரம் மதிப்புள்ள கோப்பை பரிசாக வழங்கப்படும்.

தேர்வுக் குழு: மின் ஆளுமைக்கான சிறந்த விருதினை பெறும் துறைகளை தேர்வு செய்வதற்காக ஒரு கூர்ந்தாய்வு குழுவும், ஒரு தேர்வுக் குழுவும் அமைக்கப்படும்.