கடற்றொழிலாளர் பிரச்சினை: வடக்கு மீனவர் பிரதிநிதிகள் அப்துல் கலாமுக்கு மகஜர்

கடற்றொழிலாளர் பிரச்சினை: வடக்கு மீனவர் பிரதிநிதிகள் அப்துல் கலாமுக்கு மகஜர்
மகேஸ்வரன் பிரசாத்
யாழ்ப்பாணத்துக்கு விஜயம் மேற்கொண்டிருந்த இந்தியாவின் முன்னாள் குடியரசுத் தலைவரும், அணு விஞ்ஞானியுமான அப்துல் கலாம், மீனவர் பிரதிநிதிகளைச் சந்தித்து அவர்களின் குறைகளைக் கேட்டறிந்தமை குறித்துப் பெருமையடைவதாக வடமாகாண கடற்றொழிலாளர்களின் கூட்டமைப்பின் தலைவர் சி.தவரட்ணம் தெரிவித்தார்.

யாழ்ப்பாணத்துக்கு வந்திருந்த அவரைப் பொதுமக்கள் சந்திப்பதற்கு எந்த ஏற்பாடுகளும் மேற்கொள்ளப்பட்டி ருக்கவில்லை.

இருந்தபோதும் அவரைச் சந்திக்கும் சந்தர்ப்பம் எமக்குக் கிடைத்ததாக அவர் தினகரனுக்குக் கூறினார். இது தொடர்பில் தொடர்ந்தும் கருத்துத் தெரிவித்த அவர், நாம் சென்றிருந்தபோது அவர் புறப்படுவதற்காகக் காரில் ஏறத்தயாரானார்.

எனினும், எம்மைக் கண்டவுடன் மீண்டும் திரும்பி வந்து எம்முடன் அமர்ந்திருந்து கலந்துரையாடினார். உயர்ந்த நிலையிலிருக்கும் ஒரு சிறந்த கல்விமான் எம்மைச் சந்தித்து கருத்துக்களைக் கேட்டறிந்தமை குறித்து நாம் மகிழ்ச்சியடைகிறோம்.

தற்பெருமை இல்லாத இவ்வாறானதொரு சிறந்த தலைவர் யாழ்ப்பாணத்துக்கு வந்தமையையிட்டு நாம் பெருமை அடைகின்றோம். இந்திய மீனவர்களின் அத்துமீறிய மீன்பிடியால் வடபகுதி மீனவர்களுக்கு ஏற்பட்டிருக்கும் பாதிப்புக் குறித்து நாம் விளக்கிக் கூறியதுடன், இதுதொடர்பான மகஜர் ஒன்றையும் அவரிடம் கையளித்தோம். இவ்விடயம் தொடர்பில் இந்திய அரசாங்கத்தின் கவனத்துக்குத் தான் கொண்டு செல்வதாகவும் உறுதிமொழி வழங்கினார் என்றும் அவர் தெரிவித்தார்.