கிழக்குப் பல்கலைக்கழக உபவேந்தராக சிங்களவர் நியமனம்!

by *சம்ஸ் Fri 27 Jan 2012 - 22:32

கிழக்கு பல்கலைக்கழகத்தின் உபவேந்தரின் கடமைகளையாற்றுவதற்கு சிங்களவரான பேராசிரியர் நிமால் ரஞ்சித் அத்தநாயக்க உயர்கல்வி அமைச்சரால் நியமிக்கப்பட்டமைக்கு எதிர்ப்புக் கிளம்பியுள்ளது.

இந்தநியமனம் பற்றி பல்கலைக்கழக மானியங்கள் ஆணைக்குழுவினால் தற்போதைய பதில் உபவேந்தராக கடமையாற்றும் கே.பிரேம்குமாருக்கு நேற்று அறிவிக்கப்பட்டுள்ளது.

2009 ஆம் ஆண்டு கிழக்கு பல்கலைக்கழகத்தில் ஏற்பட்ட நெருக்கடி நிலையொன்றின் காரணமாக உபவேந்தர் பதவியிருந்த கலாநிதி என்.பத்மநாதன் பதவிவிலகினார். இதையடுத்து கலாநிதி கே.பிரேம்குமார் பதில் உபவேந்தராக கடமையாற்றி வந்தார்.

இது தொடர்பாக வெளியிடப்பட்டுள்ள சிறப்பு வர்த்தமானி அறிவித்தலின் படி, கடந்த 23ம் நாள் முதல் இந்த நியமனம் நடைமுறைக்கு வந்துள்ளது.

பேராசிரியர் நிமால் ரஞ்சித் அத்தநாயக்க ஏற்கனவே கிழக்குப் பல்கலைக்கழக பேரவையின் கடமைகளை ஆற்றும் தகுதிவாய்ந்த அதிகாரியாக கடந்த ஆண்டு மாசி தொடக்கம் மார்கழி வரை பணியாற்றியுள்ளார்.

தற்போது கிழக்கு பல்கலைக்கழக பேரவை நியமிக்கப்பட்டதையடுத்து, குறித்த பதவியும் முடிவடைந்த நிலையிலே இந்தப் புதிய நியமனம் இடம்பெற்றுள்ளது.

கிழக்கு பல்கலைக்கழக பேரவையினால் உபவேந்தர் பதவிக்கு மூன்று பேரின் பெயர்கள் பரிந்துரை செய்யப்பட்டு பல்கலைக்கழக மானியங்கள் ஆணைக்குழுவின் ஊடாக ஜனாதிபதிக்கு அனுப்பி வைக்கப்பட்டுள்ளது.

இந்நிலையில், புதிய உபவேந்தர் நியமனம் அடுத்த சில வாரங்களில் இடம்பெறலாம் என்று எதிர்பார்க்கப்படும் சூழ்நிலையில் இந்த நியமனம் இடம்பெற்றுள்ளமை தம்மை அதிர்ச்சிக்குள்ளாக்கியுள்ளதாக தமிழ்த் தேசியக் கூட்டமைப்பின் மட்டக்களப்பு மாவட்ட நாடாளுமன்ற உறுப்பினர் பொன்.செல்வராசா கவலை வெளியிட்டுள்ளார்.

இது தொடர்பாக சிறிலங்காவின் உயர்கல்வி அமைச்சர் எஸ்.பி.திசநாயக்கவை நேரில் சந்தித்து தனது எதிர்ப்பை தெரிவிக்கப் போவதாகவும், புதிய உபவேந்தர் நியமனத்தை விரைவாக செய்யுமாறு தான் வலியுறுத்தப் போவதாகவும் அவர் மேலும் தெரிவித்தார்.