கடித்த பாம்பு எது என தெரியாமல் இரு பாம்புகளை உயிருடன் பிடித்து வந்த உறவினர்கள்!!

மாணவியை கடித்த பாம்பு எது என தெரியாமல் இரு பாம்புகளை உயிருடன் பிடித்து வந்ததால் திண்டுக்கல் அரசு மருத்துவமனையில் நோயாளிகள் அலறியடித்து ஓட்டம் பிடித்தனர்.

திண்டுக்கல் அருகே தாடிக்கொம்பு பள்ளபட்டியைச் சேர்ந்தவர் பழனியாண்டி. இவரது மகள் ஜமுனா(11). இவர் அதே பகுதியில் உள்ள அரசு பள்ளியில் 5ம் வகுப்பு படிக்கிறார். கடந்த 5ம் தேதி தனது வீட்டருகே ஜமுனா விளையாடி கொண்டிருந்தார்.

அப்போது சிறுமியை ஒரு பாம்பு கடித்துவிட்டு அருகில் உள்ள முட்புதரில் மறைந்து விட்டது. பாம்பு கடியால் சிறுமி துடித்தார். அவரை உறவினர்கள் உடனடியாக திண்டுக்கல் அரசு மருத்துவமனையில் அனுமதித்தனர்.

அங்கு அவருக்கு சிகிச்சை அளிக்கப்பட்டது. மேல்சிகிச்சை அளிக்க, எந்த வகை பாம்பு கடித்தது என டாக்டர் கேட்டதால், சொல்ல தெரியாமல் உறவினர்கள் திகைத்தனர். பின்னர், கடித்த பாம்பை பிடிக்க முடிவு செய்த உறவினர்கள்,

பாம்பு பிடிக்கும் நபரை அழைத்துக் கொண்டு ஜமுனா வீட்டிற்கு சென்றனர். பாம்பு சென்ற முட்புதர் அருகில் பாம்பு பிடிக்கும் நபர் மகுடி வாசித்தார். அப்போது புதரின் மறைவில் இருந்து ஒரு நல்லபாம்பு வந்தது.

சிறிது நேரத்தில் ஒரு குட்டி கட்டுவிரியன் பாம்பும் வந்தது. ஒரே நேரத்தில் இரண்டு பாம்பு வந்ததால், சிறுமியை கடித்த பாம்பு எது என தெரியாமல் இரண்டையும் உயிருடன் பிடித்து கொண்டு உறவினர்கள் திண்டுக்கல் அரசு மருத்துவமனைக்கு சென்றனர்.

பாம்புகளை பார்த்த நோயாளிகள் அலறியடித்துக் கொண்டு ஓட்டம் பிடித்தனர். பின்னர் அந்த பாம்புகளை பார்த்த டாக்டர்கள், மாணவியை கடித்தது கட்டுவிரியன் என உறுதி செய்து, சிறுமிக்கு சிகிச்சை அளித்தனர்.

இதையடுத்து உறவினர்கள் இரண்டு பாம்புகளையும் திண்டுக்கல் வனத்துறை ஊழியர்களிடம் ஒப்படைத்தனர். இச்சம்பவத்தால் சிறிதுநேரம் பரபரப்பு ஏற்பட்டது.

அடேங்கப்பா இதே சம்பவம் நேற்று முன்தினம் எங்கள் ஊரில் நடந்தது!
இந்த சம்பவம் எழுவட்டுவான் மருத்துவ மனையில் பாம்பு கடித்தாக ஒரு வாலிபர் இரு பாம்புகளுடன் மருத்துவ மனை வந்திருந்தார் அனைவரும் ஆச்சர்யத்துடன் பார்த்தார்கள்.