அரசியல்வாதிகளின் சமூக சேவை அமைப்புகள் கணக்காய்வுக்குட்படுத்தப்படும்:

அரசியல்வாதிகள் நடாத்தும் சமூக சேவை அமைப்புகள் இனிவரும் காலங்களில் கணக்காய்வுக்குட்படுத்தப்படுமென அரசாங்கம் அறிவித்துள்ளது.
ஆளுங்கட்சி மற்றும் எதிர்க்கட்சி அரசியல்வாதிகளில் பலரும் தமக்குச் சொந்தமான சமூகசேவை நிறுவனங்களை வைத்துக் கொண்டுள்ளனர். அமைச்சர், பிரதியமைச்சர்கள், பாராளுமன்ற உறுப்பினர்கள், மாகாண சபை உறுப்பினர்கள் மட்டுமன்றி நகர சபை உறுப்பினர்கள் வரை அவர்களில் உள்ளடங்குகின்றனர்.

ஆயினும் அவர்களது சமூக சேவை நிறுவனங்களுக்குக் கிடைக்கப் பெறும் நிதி எவ்வளவு? எவ்வகையில் கிடைக்கின்றது? என்ன விதத்தில் செலவு செய்யப்படுகின்றது என்பது குறித்து கண்காணிப்பதற்காக இதுவரை எதுவிதமான ஒழுங்குவிதி ஏதும் இருக்கவில்லை.

அவர்களில் ஒரு சிலர் அவ்வாறு கிடைக்கும் நிதியை தமது சொந்தப் பயன்பாட்டுக்கும், உறவினர், நண்பர்களின் தேவைகளுக்கும் பயன்படுத்தியிருப்பதும் தெரிய வந்துள்ளது. தவிரவும் வேறு வழிகளிலும் முறைகேடாகப் பயன்படுத்துவது தொடர்பிலும் தகவல்கள் வெளியாகியுள்ளன.

எனவே அவற்றை ஒரு ஒழுங்குமுறைக்குட்படுத்தும் நோக்கில் அரசாங்கம் அவ்வாறான சமூக சேவை அமைப்புகளை கணக்காய்வுக்குட்படுத்தத் தீர்மானித்துள்ளது. அதற்கு மேலதிகமாக ஏனைய சமூக சேவை அமைப்புகளையும் கணக்காய்வுக்குட்படுத்தவும் அரசாங்கம் உத்தேசித்துள்ளது .