படிக்காதவர்களுக்கும் தேமுதிக ஆட்சியில் வேலை

விழுப்புரம் மாவட்டம் திருக் கோவிலூரில் இலவச கணினி மையம்,நலத் திட்டப் பணிகளை தொடங்கி வைத்து அவர் பேசியது; அ.தி.மு.க, தி.மு.க. இருவருமே மக்களை ஏமாற்றி ஓட்டு வாங்கிச் சென்று, பிறகு மக்களைப் பற்றிச் சிந்திப்பதே கிடையாது. தமிழகம் முழுவதும் நடைபெற்று வரும் மணல் கொள்ளையைக் கணக்கீட்டால் மாதம் ஒன்றுக்கு ரூ.100 கோடி அரசுக்கு இழப்பு ஏற்படுகிறது. மக்களுக்குச் சேர வேண்டிய இந்த வரிப்பணம் மறைமுகமாக ஆட்சியாளர்களுக்குச் சென்றடைகிறது. மக்களுக்கு உதவி செய்யத்தான் அரசாங்கம். ஆனால் தமிழகத்தின் நிலைமை அப்படி இல்லை. நான் சட்டப்பேரவைக்கு வராததைப் பற்றி பேசுபவர்கள் என்னை பார்த்து விஜயகாந்த் பயப்படுகிறார் என்கின்றனர்.

நான் யாருக்கும் எப்போதும் பயப்பட மாட்டேன். கடவுளுக்கும், மனசாட்சிக்கு மட்டுமே பயப்படுவேன். அடுத்து என் மீது பாசம் வைத்துள்ள அன்பு நெஞ்சங்களுக்கு கட்டுப்படுவேன்.இதைத் தவிர வேறு யாரும் என்னைக் கட்டுப்படுத்த முடியாது. யாரும் எதையும் யோசித்து பேச வேண்டும். பொதுவாக நல்லவர்கள் நாடாள வேண்டும். அப்போதுதான் நல்லது நடக்கும். நாட்டில் நடக்கின்ற அக்கிரமங்களைத் தட்டிக் கேட்டால் விஜயகாந்துக்கு என்ன தெரியும் எனக் கேட்கின்றனர். எனக்கு என்னென்ன தெரியும் என்பதை நானே தெரிவிக்கும் நாள் வெகுவிரைவில் வரும்.

தமிழகத்தில் பஸ் கட்டணம், மின் கட்டணம், பால் விலை அதிகளவில் உயர்த்தப்பட்டுள்ளது. சட்டப் பேரவையில் உறுப்பினர்கள் மற்றும் அமைச்சர்கள் காலில் விழுந்து கும்பிட்டால்தான் முதல்வர் ஜெயலலிதாவுக்கு குஷியாக இருக்கிறது.பேரவையில் எதிர்க்கட்சியினர் பேசவே முடிவதில்லை. அப்படியே பேச ஆரம்பித்தால் மைக் அணைந்து விடுகிறது. ஆனால், ஆளுங்கட்சியைச் சேர்ந்தவர்கள் பேசினால் மட்டும் மைக் வேலை செய்வதன் மாயம்தான் தெரியவில்லை என்றார் விஜயகாந்த்.