இந்தியாவில் விடுதலை செய்யப்படவுள்ள இலங்கை மீனவர்கள்!

May 22nd, 2012 அன்று பிரசுரிக்கப்பட்டது.

இந்தியாவில் தடுத்து வைக்கப்பட்டுள்ள இலங்கை மீனவர்கள் சிலர் நாளை தினம் விடுதலை செய்யப்படவுள்ளதாகத் தெரிவிக்கப்படுகின்றது.

இம் மீனவர்கள் இந்திய கடற்பிராந்தியத்தில் அத்துமீறி நுழைந்து மீன்பிடியில் ஈடுபட்டதாக குற்றம்சுமத்தப்பட்டுத் தடுத்து வைக்கப்பட்டிருந்தனர்.

இதன்படி, 27 பேர் வரை நாளை விடுதலையாவதாக மீன்பிடி மற்றும் நீரியல் வளத்துறை அமைச்சின் பேச்சாளர் ஒருவர் தெரிவித்துள்ளார். கடந்த ஏப்ரல் 19 ஆம் திகதி தமிழ் நாட்டு கடற்பரப்பில் கைதுசெய்யப்பட்ட இலங்கை மீனவர்களே விடுதலையாகவுள்ளனர்.

அவர்கள் பயணித்த ஐந்து படகுகளும் விடுவிக்கப்பட்டுள்ளன. இதன்படி குறித்த மீனவர்கள் விரைவில் நாடு திரும்பவுள்ளனர் என கடற்தொழில் அமைச்சு தகவல் வெளியிட்டுள்ளது.

கைது செய்யப்படும் மீனவர்களை விடுவித்து மீண்டும் இலங்கைக்கு அழைத்து வருவதற்காக வருடம் ஒன்றிற்கு 2 மில்லியன் முதல் 3 மில்லியன் ரூபா வரை செலவிடப்படுகின்றன.

இதேவேளை, தற்போது இந்தியாவில் இலங்கை மீனவர்கள் 21 பேர் மாத்திரமே தடுத்து வைக்கப்பட்டுள்ளதாக அவர் குறிப்பிட்டார்.

எனினும், இரு நாடுகளுக்கும் உரித்தான பிரத்தியேக பொருளாதார வலயங்களுக்குள் நுழைய வேண்டாம் எனவும் மீன்பிடித்துறை அமைச்சர் ராஜித சேனாரட்ன அறிவுறுத்தியுள்ளார்.