சென்னை, மும்பை அணி மோதிய போட்டியில் ரூ.60 கோடி சூதாட்டம்

by **நேசமுடன் ஹாசிம்** Sat 26 May 2012 - 8:02

ஐ.பி.எல் 5 தொடரின் சென்னை சூப்பர் கிங்ஸ், மும்பை இண்டியன்ஸ் அணிகள் இடையேயான தகுதி நீக்கச் சுற்றின் போது,சுமார் 60 கோடி ரூபாய் அளவுக்கு சூதாட்டம் நடைபெற்றிருப்பது தெரியவந்துள்ளது.
ஒவ்வொரு பந்து வீசப்பட்டபோதும்,அது சிக்சரா, பவுண்டரியா அல்லது உதிரி ஓட்டங்களா அல்லது விக்கெட் வீழ்ச்சியா என்று அதன் மீது பணம் கட்டப்பட்டு, சிங்கப்பூர், சார்ஜா மற்றும் இந்தியாவின் அனைத்து முக்கிய நகரங்களிலிருந்தும் 113 தொலைபேசி அழைப்புகள் வந்துள்ளது.

கடைசி இரண்டு இன்னிங்ஸ்களுக்கு முந்தைய இன்னிங்ஸ்கள் முடியும் வரை, சூதாட்டத்தை நடத்தும் புக்கிகள் ஒவ்வொரு மணி நேரத்திற்கும், சுமார் 38 லட்சம் ரூபாய் அளவுக்கு “பெட்” கட்டியுள்ளனர்.

இந்த சூதாட்டம் டெல்லியின் வடமேற்கு பகுதியில் உள்ள ஒரு மிகச்சிறிய அறையில்தான் நடந்தேறியுள்ளது.

அக்கம்பக்கத்து வீடுகளிலிருந்து வரும் சத்தங்கள் எதுவும் உள்ளே கேட்காதவாறு, இதற்கென்றே பிரத்யேகமாக அமைக்கப்பட்ட சவுண்ட் புரூப் வசதியுடன் கூடிய அறையில், பிரத்யேக தொலைபேசி எக்ஸ்சேஞ்சை நிர்மாணித்து, இரண்டு இளைஞர்கள் இந்த இந்த சூதாட்டத்தை அரங்கேற்றியுள்ளனர்.

இந்த இளைஞர்கள் ஒவ்வொரு தொலைபேசி அழைப்புக்கும், சூதாட்டக்காரர்(புக்கி) களிடமிருந்து 4,000 ரூபாய் கட்டணமாக வசூலித்துள்ளனர்.

இவ்வாறு ஒரு அறையில் சூதாட்டம் நடப்பதாக, டெல்லி போலீசார் மோப்பம் பிடித்து அங்கு வருவதற்குள், ஆட்டம் ஏறக்குறைய முடியும் தருவாய்க்கு வந்துவிட்டிருந்தது. இரண்டு இன்னிங்ஸ் மட்டுமே மீதமிருந்த நிலையில்தான் அவர்கள் அங்கு வந்தனர்.

அந்த அறை அப்படியே பி.பி.ஓ அலுவலகம் போல அழகாக வடிவமைக்கப் பட்டிருந்தது என்றும் இந்த எக்ஸ்சேஞ்ச் அமைப்பை பார்த்து பொலிசாரே வியந்துபோனதாகவும் தெரிவித்த டெல்லி பொலிஸ் துணை ஆணையாளர் அஷோக் சந்த், அங்கிருந்த 113 கைபேசிகளும்,100 க்கும் அதிகமான ஹியர் போன்களும் கைப்பற்றப்பட்டதாக தெரிவித்தார்.

அமித் என்ற இளைஞன் மட்டும் பிடிபட்டுள்ளான் இன்னொரு நபர் பொலிசாரை கண்டு தப்பியோடிவிட்டதாக தெரிவித்தார்.

அன்று இரவு வேறு ஒரு இடத்திலும் ஷியாம் அரோரா, தீபக் என்ற இரு இளைஞர்களை கைது செய்துள்ளனர். இவர்களிடமிருந்தும் மடிக்கணினி, 2 தொலைக்காட்சி பெட்டி மற்றும் 118 கைபேசிகளையும் கைப்பற்றியுள்ளனர்.

இந்த போட்டியில் சென்னை அணி, மும்பை இண்டியன்ஸ் அணியை வீழ்த்தியதன் மூலம் இறுதிப் போட்டியில் நுழைவதற்கு, டெல்லி டேர்டெவில்ஸ் அணியுடன் மோதும் வாய்ப்பைப் பெற்றது குறிப்பிடத்தக்கது.