உலகின் முதல் மிகச் சிறிய செயற்கை இதயமாற்றுச் சிகிச்சை!

இத்தாலி வைத்தியர்கள் 16 மாதக் குழந்தையின் உயிரை இதய மாற்றுச் சிகிச்சைமூலம் காப்பாற்றியுள்ளார்கள். இதுவே உலகின் மிகச்சிறிய செயற்கை இதயமாற்றுச் சிகிச்சையாகும்.

இத்தாலி, ரோமின் Bamnino Gesu வைத்தியசாலையின் வைத்தியர்களால் கடந்த மாதம் மேற்கொள்ளப்பட்ட சத்திரசிகிச்சையானது வெற்றிகரமான விளைவைத் தந்துள்ளதாக இவ்வாரம் வெளியிடப்பட்டுள்ளது.

அக்குழந்தை சிகிச்சைக்கு முன்பாக 13 நாட்கள் அதனை உயிரோடு வைத்திருக்க பெரும்பிரயத்தனங்கள் மேற்கொள்ளப்பட்டதென்றும் தற்போது அது நன்றாகவே செயற்படுகின்றதென்றும் குறிப்பிட்டது.

இக்குழந்தைக்கு இதயத் தசைநார் நோய் இருந்ததென்றும் வழமையாக நீளமாக்கப்பட்ட இழைகள் அல்லது பெரிய இழைகள் இதயத்தில் காணப்படுவதே இந்நோயின் அறிகுறியாகும். இந்த நோய் படிப்படியாக இதயத்தினைப் பலவீனமாக்கிக் குருதியைப் பம்பி வெளியேற்றவிடாது.

இச்சத்திர சிகிச்சையானது உண்மையில் ஒரு மைற்கல்லாகுமென வைத்தியர் ஒருவர் தெரிவித்தார். தற்போது குழந்தையில் பொருத்தப்பட்ட கருவியானது இதயமாற்றுச் சிகிச்சைக்கு ஒரு பாலமாகப் பயன்படுத்தப்பட்டுள்ளதாகவும் பின்னர் அதுவே நிரந்தரமாக மாறிவிடுமென்றும் தெரிவித்தார்.

இச்சிகிச்சைக்கு முன்னர் அக்குழந்தையில் பொருத்தப்பட்டிருந்த இரத்தத்தைப் வெளியேற்றுவதற்காக வைக்கப்பட்ட கருவியைச் சுற்றிலும் கிருமித்தொற்று ஏற்பட்டிருந்ததால் அது மிகவும் சிரமப்பட்டுக்கொண்டிருந்தது.
சத்திர சிகிச்சைரீதியாகப் பார்த்தால் இதுவொரு சிரமமான வேலையல்லவென்றும் அக்குழந்தை முன்னரே பல தடவைகள் சத்திரசிகிச்சை செய்யப்பட்ட நிலையில் இருந்ததே இதனைச் சிரமமாக்கிய விடயமென்றனர் வைத்தியர்கள்.

உள்ளே வைக்கப்பட்ட 11 கிராம் நிறையுடைய சிறிய ரைற்றானியப் பம்பியினால் நிமிடத்திற்கு 1.5 லீற்றர் குருதியை வெளியேற்றமுடியும். வளர்ந்த ஒரு நபருக்காயின் செயற்கை இதயத்தின் நிறை 900 கிராமாக இருக்கும்.

இக்குழந்தை பிறந்து ஒரு மாதத்திலிருந்தே தமது கவனிப்பில் இருந்துவருகின்றதென்றும் அவன் தங்களில் ஒருவனாக, ஒரே குடும்பமாகவே மாறிவிட்டானென்றும் வைத்தியர்கள் தெரிவித்தனர்.

இக்குழந்தையில் பொருத்தப்பட்ட கருவியானது அமெரிக்க வைத்தியரான றொபேட் ஜாவிக்கினால் உருவாக்கப்பட்டதென்றும் இது முன்னர் மிருகங்களுக்கு மட்டுமே பொருத்தப்பட்டுப் பரிசோதனை செய்துபார்க்கப்பட்டதென்றும் தெரிவித்தார்.

இச்சத்திர சிகிச்சையைச் செய்துபார்க்கமுன்னர் வைத்தியர் ஜாவிக்கிடமிருந்தும் இத்தாலிய சுகாதார அமைச்சிடமிருந்தும் சிறப்பு அனுமதியை அவ்வைத்தியசாலை பெறவேண்டியிருந்ததென்றும் தெரிவிக்கப்படுகின்றது.